કાર્યવાહી:સુસાઈડ પોઈન્ટ તરીકે ઓળખાતા લુણાવાડાના આગરવાળા પુલ પર લોખંડની જાળી લગાવાઈ

આગરવાડા મુકામે મહીસાગર નદીના પુલ પરથી કૂદકો મારી આત્મહત્યાના બનાવો સતત બને છે. જેથી પુલને સુસાઈડ પોઈન્ટ તરીકે ઓળખે છે. છેલ્લા બે વર્ષથી પુલની પેરાફીટ પર લગાવેલ લોખંડની જાળીઓ પૈકી વચ્ચેના ભાગની જાળીઓ તૂટી જઈ નદીના પાણીમાં પડી ગયેલ હતી.જાળીઓ ન હોવાથી વધુ પ્રમાણમાં આત્મહત્યાના બનાવો બનતા હતા.

જેથી આત્મહત્યાના બનાવો ન બને તે માટે પુલની પેરાફીટ ઉપર લોખંડની જાળીઓ ન હોવાથી લગાવવા માટે કોઠંબા પોલીસ સ્ટેશનના પોલીસ સબ ઇન્સ્પેક્ટર ડી એચ રાઠોડ દ્વારા આગરવાડા મહીસાગર નદીના પુલની આસપાસના ગામના સરપંચ જયંતીભાઈ પ્રજાપતિ નવા રાબડીયા, વિજયભાઈ પટેલ થાણાસાવલી, હર્ષદભાઈ માયાવંશી આગરવાડા તથા કાંતિભાઈ માછી માછીયાના મુવાડા નાઓનો સહયોગ મેળવી લોખંડની જાળીઓ તૈયાર કરાવી રૂબરૂ હાજર રહી ફીટ કરાવી હતી.