સમસ્યા:ખેંગારપરમાં ખાતર ખરીદવા ખેડૂતોની કતારો : અનેક ખાલી હાથે પરત ગયા

રાપર16 દિવસ પહેલા
  • કૉપી લિંક
  • કચ્છમાં સહકારી ખાતરની અછત સર્જાતા ખેડૂતોને હાલાકી
  • મર્યાદિત જથ્થો અાવતો હોવાથી અનેક સ્થળો પર અા જ સમસ્યા : શિયાળુ પાક મબલખ પ્રમાણમાં લેવાની ઇચ્છા

કચ્છમાં આ વર્ષે પડેલા સારા વરસાદ બાદ શિયાળુ પાક મબલખ પ્રમાણમાં લેવાની ઇચ્છાએ ખેડૂતો ડીએપી અને યુરિયા ખાતર ખરીદવા પડાપડી કરી રહ્યા છે, પરંતુ અપૂરતા જથ્થાને લઈ જિલ્લામાં ખાતરની અછત કિસાનો માટે હાલાકી સર્જી રહી છે. જેની સાક્ષી પૂરતા દ્રશ્યો રાપર તાલુકાના ખેંગારપર ગામથી સામે આવ્યા હતાં. જ્યાં મંગળવારે સવારે ખાતર મેળવવા ખેડૂતોએ સહકારી મંડળી બહાર લાંબી કતારો લગાવવી પડી હતી.

સવારે જ લાંબી લાઇનો અને બીજીબાજુ મર્યાદિત જથ્થાને કારણે ટોકન પદ્ધતિ દ્વારા ખાતરનું વિતરણ કરવામાં આવ્યું હતું. અપૂરતા ખાતરના જથ્થાને લઈ ખેડૂતોમાં નારાજગી પ્રવર્તી રહ્યાનું જાણવા મળ્યું હતું. શિયાળુ પાક માટે ખાતરની ખપત વધી હોવાથી પણ આછત પડી રહ્યાનું તારણ બહાર અાવ્યું છે.

શિયાળા દરમિયાન જીરું, વરિયાળી, રાયડો, અજમો, ઇસબગુલ સહિતના પાકની ખેતી કરવા ખેડૂત વર્ગે બિયારણ ખરીદ કરી લીધું છે પરંતુ યુરિયા અને ડીએપી ખાતરની અછતથી હાલાકી ભોગવી રહ્યા છે. વિવિધ સહકારી મંડળીઓમાં મર્યાદિત જથ્થામાં ખાતર મળતું હોઇ ખેતી કાર્ય સમિતિ બની રહ્યું છે. રાપરના ખેંગારપરમાં સવારના 8 થી 9 વાગ્યા દરમ્યાન 300 ખેડૂતોને ટોકન પદ્ધતિ દ્વારા ખાતર વિતરણ કરાયુ હતું. જ્યારે મોડા પડેલા ખેડૂતોને ખાલી હાથે પરત જવુ પડ્યું હતું.

સબસીડી મોડી અાવવાથી અછતની શંકા
આ અંગે કૃષિ ક્ષેત્રના જાણકાર સૂત્રોએ જણાવ્યું હતું કે સહકારી મંડળીઓને ખાતરનો જથ્થો પૂરો પાડતી સરદાર, કૃભકો અને ઇફકો જેવી કંપનીઓને સરકાર તરફથી અમુક ટકા ખેડૂતલક્ષી સબસીડી આપવામાં આવતી હોય છે. આ સબસીડી રિલીઝ કરવામાં ન આવતા કંપનીઓ પૂરતું ઉત્પાદન કરી શકતી નથી. જેના કારણે ખાતરની અછત સર્જાતી હોય છે. અલબત્ત વર્તમાન સમયમાં રાજ્યમાં વિધાનસભાની ચૂંટણીને લઈ ખુદ સરકાર વ્યસ્ત હોવાથી ખાતર અછત તાકીદે દૂર થાય એવા સંકેતો હાલઘડી દેખાતા નથી.

અન્ય સમાચારો પણ છે...