મક્કમ નિર્ણય:લોરિયાના ગ્રામજનોએ મતદાનનો બહિષ્કાર કરતા તંત્ર થયું દોડતું

ભુજ3 મહિનો પહેલા
  • કૉપી લિંક
  • વહીવટી તંત્રના સમજાવવા બાદ પણ ગ્રામજનો નિર્ણય પર મક્કમ

વિધાનસભાની ચૂંટણી સંદર્ભે તંત્ર દ્વારા વિવિધ અભિયાનો અંતર્ગત મતદાન જાગૃતિની જાહેરાતો કરવામાં આવી રહી છે. ત્યારે ભુજ તાલુકાના લોરિયાના ગ્રામજનોએ વિધાનસભાની ચૂંટણીમાં મતદાનનો બહિસ્કાર કર્યો છે. જાલપા માતાજીના મંદિર અને પરમેશ્વરદાદાના મંદિરે રૂપિયા 8 લાખની ચોરીનો બનાવ 9 માસ અગાઉ બન્યો હતો. જેનો હજી સુધી ભેદ ન ઉકેલાતાં ગ્રામજનોએ મતદાન બહિસ્કારનો નિર્ણય લેતાં વહીવટી તંત્ર દોડતું થયું છે.હાલ વિધાનસભાની ચૂંટણીનો ધમધમાટ શરૂ થઈ ગયો છે. તેવામાં લોરિયાના 1500 મતદારો મતદાનથી દૂર રહેશે તેવો નિર્ણય સમસ્ત ગ્રામજનોએ લેતા માહોલ ગરમાયો છે.

ગામના આગેવાન અનિલભાઈ ભાનુશાલીએ જણાવ્યું કે, ગામમાં નવ માસ અગાઉ જાલપા માતાજીના મંદિરે અને પરમેશ્વર દાદાના મંદિરે તસ્કરો ત્રાટક્યા હતા. જેમાં મંદિરના આભૂષણો સહિત આસ્થાનું પ્રતિક એવા પરમેશ્વરદાદાના ઘોડા સહિત તસ્કરો રૂપિયા 8 લાખનો મુદામાલ ચોરી ગયા હતા.

જેની માધાપર પોલીસ મથકે ફરિયાદ નોધાવવામાં આવી હતી.પરંતુ આજદિન સુધી પોલીસે ચોરીનો ભેદ ન ઉકેલતાં ગ્રામજનોએ નારાજગી વ્યક્ત કરી વિધાનસભાની ચૂંટણીમાં મતદાનનો બહિષ્કાર કર્યો છે. જેના પગલે વહીવટી તંત્ર લોરિયા ખાતે દોડી ગયું હતું. તંત્ર દ્વારા સમજાવવા છતાં ગ્રામજનો પોતાના નિર્ણય પર મક્કમ રહ્યા છે.

રાજ્યભરમાં તપાસ કરાઇ, હજી પણ પોલીસ કાર્યરત : માધાપર પીઆઈ
લોરિયા ગામે મંદિરમાં થયેલ ચોરીના બનાવ અંગે માધાપર પોલીસ મથકના પીઆઈ એ.જી.પરમાર સાથે વાત કરતાં તેમણે જણાવ્યું કે, ચોરીના બનાવ બાદ તપાસ એલસીબીને સોપવામાં આવી હતી. જેમાં પોલીસ દ્વારા રાજ્યભરમાં તમામ સ્રોતથી તપાસ કરવા છતાં આરોપીઓ પકડમાં આવ્યા નથી. આ ઉપરાંત રૂદ્રમાતા મંદિરે દાનપેટીમાંથી થયેલી ચોરીના બનાવનો ભેદ પણ હજી સુધી અકબંધ છે.

અન્ય સમાચારો પણ છે...