તહેવારોનો પ્રારંભ:શ્રાવણ આવ્યો તહેવારોની મોસમ લાવ્યો; હવે કારતક મહિના સુધી દર 4 દિવસે 1 પર્વ આવશે

સિદ્ધિ યોગ સાથે પવિત્ર શ્રાવણ માસનો પ્રારંભ થઈ ગયો છે. ભગવાન શિવની આરાધાનના આ મહિનાની શરૂઆતની સાથે તહેવારોનો પણ પ્રારંભ થશે. જ્યારે આગામી 103 દિવસ એટલે કે કારતક સુદ પૂનમ સુધી 40થી વધુ દિવસ વ્રત અને તહેવારો આવશે. ચાલુ વર્ષે કચ્છભરમાં સાર્વત્રિક મેઘમહેર થતાં ખુશાલી ફેલાઇ છે, શહેરો તથા ગ્રામ્ય વિસ્તારોમાં ઉજવાનારા પર્વોમાં લોકો બેવડા ઉત્સાહ સાથે ભાગ લેશે.

શ્રાવણમાં નાગ પંચમી અને રક્ષાબંધન, રાંધણ છઠ, શીતળા સાતમ, જન્માષ્ટમી, ગણેશોત્સવ આવશે. આસો માસમાં સૌથી વધુ દિવસ ઉત્સવ મનાવાશે, જેમાં 15 દિવસ શ્રાદ્ધ પક્ષ, 9 દિવસ નવરાત્રી, દશેરા અને શરદ પૂનમ આવશે. કારતક મહિનામાં ચોથ, પુષ્યનક્ષત્ર, પાંચ દિવસ દિવાળી, દેવઊઠી એકાદશી અને દેવદેવાળી પર્વ આવશે. દેવઊઠી અગિયારસની સાથે જ ચાતુર્માસ પૂરા થશે.

ભુજમાં હિલોળા લેતા હમીરસર કાંઠે મેળો જામશે
કુકમા પાસે ખાત્રોડના ડુંગરે આશાપુરા મંદિરે તેમજ ભુજમાં ભુજિયાની તળેટીમાં મેળો યોજાવા સાથે મેળો મોસમ શરૂ થઇ છે. હવે ભુજના હમીરસર તળાવના કાંઠે સાતમ-આઠમના મેળાની રંગત જામશે. ચાલુ સાલે તળાવ ભરાયેલું હોતાં રોનક વધી જશે. આ ઉપરાંત ભાદરવા મહિનામાં મિનિ તરણેતર ગણાતા મોટા યક્ષ અને વોંધ પાસેના રામદેવપીર મંદિરે પણ મોટો મેળો ભરાશે. મેઘરાજાએ મહેર કરતાં લોકો મોટી સંખ્યામાં ઉમટી પડે તેવી સંભાવના છે.

આસો મહિને નવરાત્રિ અને દિવાળી ઉમંગે ઉજવાશે
શ્રાવણ બાદ ભાદરવા મહિનામાં ઠેર-ઠેર દુંદાળા દેવ ગણેશની સ્થાપના સાથે ઉત્સવ ઉજવાશે ત્યારબાદ આસો મહિનાના આરંભે માતાના મઢ ખાતે કચ્છની કુળદેવી આશાપુરા માતાજીના મંદિરે ધર્મોલ્લાસ સાથે નવરાત્રિની આસ્થાભેર ઉજવણી કરાશે. ભુજના આશાપુરા મંદિરે તેમજ રવના રવેચી મંદિરે પણ નોરતા ઉજવાશે. મહિનાના અંતમાં ધનતેરસથી દિપોત્સવી પર્વની અનેરા ઉલ્લાસ અને આનંદ સાથે ઉજવણી કરાશે.

​​​​​​​