'વ્યવહાર નહીં કરો તો લાકડાં જમા થઈ જશે':5 હજારની લાંચ લેવા 20 કિ.મી. દૂર કાર‎ લઈને ગયેલો ફોરેસ્ટર ઝડપાયો, મળતિયો પણ નિવૃત્ત ફોરેસ્ટર નીકળ્યો

રાજ્યમાં‌ સરકાર વિભાગમાં વધતા જતા ભ્રષ્ટાચારના દૂષણને ડામવા એન્ટિ કરપ્શન બ્યુરો (ACB) કામ કરી રહ્યું છે. નડિયાદ ACBએ ખેડા જિલ્લાના કપડવંજના ચપટિયા પાસે છટકું ગોઠવી બે લાંચિયા લોકોને ઝડપી લીધા છે. જેમાં એક નિવૃત્ત વનપાલ છે તો અન્ય મોડાસાના ફરજ પર ચાલુ વનપાલ અધિકારી છે. આ બંન્નેએ સાથે મળીને લાકડાની હેરાફેરી માટે એક પાસે લાંચનો વ્યવહાર કરતાં રૂપિયા 5 હજારની લાંચ સ્વીકારતા રંગે હાથે પકડાઈ ગયા છે. મજાની વાત તો એ છે કે જેમની પાસેથી લાંચના 5 હજાર લેવાના હતા તેમણે રૂપિયા લેવા માટે 20 કિલોમીટર દૂર બોલાવ્યા હતા અને ફોરેસ્ટર અને નિવૃત્ત ફોરેસ્ટર માત્ર 5 હજાર માટે કાર લઈને 20 કિલોમીટર દૂર ગયા પણ હતા. એવામાં એસીબીએ ઝડપી લીધા હતા.

વ્યવહાર નહીં કરો તો ટ્રેક્ટર અને લાકડાં જમા થઇ જશે તેમ કહી લાંચ માંગી
નડિયાદ ACB વિભાગનાં સૂત્રો પાસેથી મળતી માહિતી મુજબ, અરવલ્લી જિલ્લાના બાયડ પાસેના બોરલ ગામ ખાતે રહેતા અને ફોરેસ્ટ વિભાગમાં નિવૃત્ત થયેલા વનપાલ ગુણવંત સોમાભાઇ બ્રહ્મભટ્ટે આ કામના ફરિયાદી લાકડા ટ્રેક્ટર મારફતે ડેમોઇ તથા કપડવંજ ખાતેની સો મિલમાં લાકડાની હેરાફેરી કરતા હોઇ આજથી આશરે એકાદ મહિના અગાઉ આ ગુણવંત બ્રહ્મભટ્ટે ફરિયાદીના લાકડા ભરેલું ટ્રેકટર રોકી લાકડાની હેરાફેરી કરવી હોય તો ફોરેસ્ટ ખાતાના સાહેબને એટલે કે, વનપાલ વન અધિકારી મોડાસાના ભગવાનસિંહ રાજેન્દ્દસિંહ રહેવર (રહે.પીપલિયા પોસ્ટ.રૂપાલ તા.હિંમતનગર જિ.સાબરકાઠા)ને વહેવાર પેટે રૂપિયા આપવા પડશે તેમ કહ્યું હતું. આ વ્યવહાર નહીં કરો તો ટ્રેક્ટર અને લાકડાં જમા થઇ જશે તેમ જણાવી લાંચની માંગણી કરી હતી.

પહેલાં 21 હજારની લાંચ માગી હતી પછી 5 હજાર નક્કી થયા
આ ગુણવંતભાઇએ ફરિયાદી પાસે લાકડાની હેરાફેરી કરવા દેવા માટે વનપાલ વન અધિકારી ભગવાનસિંહ રહેવર વતી એક વર્ષના 21 હજારની લાંચની માંગણી કરી હતી અને તે લાંચનાં નાણાં ત્રણ હપ્તામાં એટલે કે રૂપિયા 7 હજારના કુલ ત્રણ હપ્તામાં લાંચની રકમ લેવાનું નક્કી કરેલ જેથી ફરિયાદીએ આ ગુણવંતભાઈ સાથે રકઝક કરતા ગુણવંતભાઈએ ફરિયાદીને સામેથી રૂપિયા 5 હજાર લાંચ પેટે આપી જવા જણાવેલ હતું. પરંતુ ફરિયાદી લાંચ આપવા માંગતા ન હોઇ એસીબી નડિયાદ કચેરીનો સંપર્ક કરી ફરિયાદ આપતાં ગત રોજ લાંચનું છટકું ગોઠવવામાં આવ્યું હતું. આ લાંચની ટ્રેપ ખેડા જિલ્લાના કપડવંજ તાલુકાના ચપટિયા પેટ્રોલપંપ પાસે કરાઈ હતી. ઉપરોક્ત બંને લોકો 5 હજાર નાણાં લેતા રંગેહાથે ઝડપાઈ ગયા હતા. એસીબી પોલીસે આ મામલે ગુનો નોંધી કાયદેસરની કાર્યવાહી હાથ ધરી દીધી છે.