અકસ્માતમાં મોત:કપડવંજના આતરસુંબા પાસે બાઈક પર દૂધ ભરવા જતા પશુપાલકનું કારની ટક્કરે મોત

કપડવંજના આતરસુંબા પોલીસ સ્ટેશનની હદમાં આવેલ કાભાઈના મુવાડા વિસ્તારમાં કારે મોટરસાયકલને ટક્કર મારતા સર્જાયેલા અકસ્માતમાં દૂધ ભરવા જતા યુવકનું મોત થયું છે. આ બનાવ અંગે આતરસુંબા પોલીસે ગુનો નોંધી કાર ચાલક સામે ફરિયાદ દાખલ કરી છે.

આતરસુંબા નજીક આવેલ સોલંકીપુરાના પરબતભાઇ નનાભાઈ સોલંકીનાઓ તેમનું મોટર સાયકલ નંબર (GJ-7-EC-750) લઇને ઘરેથી દૂધ ભરવા માટે કાભાઈના મુવાડા ગામે જવા માટે નીકળ્યા હતા. આ દરમિયાન કાભાઇના મુવાડા ગામના બસ સ્ટેન્ડ પહોચ્યા ત્યારે આતરસુંબા બાજુથી એક ફોર વ્હીલગાડી નંબર (GJ-1-HQ-9676)ના ચાલકે પરબતભાઈ નનાભાઇ સોલંકીની બાઇકને પાછળથી ટક્કર મારતા અકસ્માત સર્જાયો હતો.

આ અકસ્માતમાં ગંભીર ઘાયલ થયેલા પર્વતભાઈને 108 એમ્બ્યુલન્સમાં બેસાડી સારવાર માટે દાખલ કરવામાં આવ્યા હતા જ્યાં તેમનું મોત નિપજ્યું હતું. આ અકસ્માત મામલે આતરસુંબા પોલીસે કાર ચાલક સામે ગુનો નોંધી કાર્યવાહી હાથ ધરી છે.