ધોળે દિવસે તારા બતાવ્યા:પ્લેનમાં થેપલાનો ઓર્ડર અપાવવાનું કહી 7.55 લાખની છેતરપિંડી આચરી

કપડવંજના તોરણાની આધેડ મહિલા સાથે મહેમદાવાદના બે યુવકોએ પ્લેનમાં થેપલાનો ઓર્ડર અપાવવાનું કહી રૂ 7.55 લાખની છેતરપિંડી આચરી છે. ચાર માસ અગાઉ દંપતિ મહેમદાવાદ સિદ્ધિ વિનાયક મંદિરમાં દર્શને જતા પરિચયમાં આવતા મોબાઇલ નંબરની આપલે કરી હતી. દરમિયાન એક યુવકે કોન્ટ્રાકટર અને બીજાએ જનરલ મેનેજર તરીકેની ઓળખ આપી ખોટા ઓર્ડર બનાવી છેતરપિંડી આચરી છે. આ સમગ્ર બનાવ અંગે કપડવંજ ગ્રામ્ય પોલીસે ગુનો નોંધ્યો છે.

કપડવંજ શહેરના તોરણા તરપોજમાં રહેતા આધેડ મહિલા અને તેના પતિ તા.5 સપ્ટેમ્બર 2022 ના રોજ મહેમદાવાદના સિદ્ધિ વિનાયક મંદિરે દર્શન કરવા માટે ગયા હતા. દર્શન કરી દંપતિ મંદિરની બહાર બેઠા હતા તે સમયે એક ઇસમ આવી ક્યાંથી આવો છો, શું કામકાજ કરો છો કહી વાત કરવાની શરૂઆત કરી હતી. વળી પોતાનો પરિચય આપી તેનુ નામ ધવલ હરસુરા રહે,પૃથ્વી કોમપ્લેક્ષ મહેમદાવાદ જણાવી અમદાવાદ ખાતે પ્લેનમાં થેપલાના કોન્ટ્રાકટર તેમજ અલગ કોન્ટ્રાકટરના ઓર્ડર આપવાનું કામ કરતા હોવાનું જણાવ્યુ હતુ.

દરમિયાન બન્ને વચ્ચે મોબાઇલના નંબરોની આપ-લે થતા વિસેક દિવસ બાદ ધવલ અને તેની સાથે મહંમદખાલીદરજા તોરણા ગયા હતા. જ્યા મહંમદખાલીદરજાની ઓળખ અમદાવાદ એરપોર્ટ ઓથોરિટીના જનરલ મેનેજર તરીકે આપી સ્પાઇસજેટમાં થેપલાનો ઓર્ડર રૂ 6.57 લાખનો પાસ કર્યો હોવાનું જણાવી રૂ 10 લાખની વ્યવસ્થા કરવા જણાવ્યું હતું.

દરમિયાન મહંમદખાલીદરજા અને ધવલે મોબાઇલમાં ઓર્ડર બતાવી અલગ અલગ તારીખે કુલ રૂ 7.55 લાખ મેળવ્યા હતા. ત્યારબાદ ઘણા દિવસો વીતી જતા ઓર્ડરના કોન્ટ્રાકટ કોઈ જવાબ ન આપતા ન અાખરે આધેડ મહિલાઅે ફરિયાદ નોંધાવી હતી. પોલીસે ધવલ ધીરૂભાઇ હરસુરા અને મહંમદખાલીદરજા મંજૂરઆલમરઝવી મલેક વિરૂધ્ધ ગુનો નોંધ્યો છે.