પાલીકાનું વાર્ષિક બજેટ:સત્તાપક્ષના 4 સભ્યો ગેરહાજર રહેતાં વિસાવદર પાલીકાનું બજેટ નામંજૂર

વિસાવદર નગરપાલિકામાં હાલ સત્તા ભાજપ પાસે છે. પણ આજે યોજાયેલી બજેટની બેઠકમાં સત્તાપક્ષનાજ 4 સભ્યો ગેરહાજર રહેતાં બજેટ નામંજૂર થયું હતું. જ્યારે વિકાસ માટેના બીજા ઠરાવો સર્વાનુમતે મંજૂર થયા હતા. વિસાવદર નગરપાલિકામાં હાલ ભાજપના 13 અને કોંગ્રેસના 11 સભ્યો હોઇ ભાજપ સત્તામાં છે. આજે નગરપાલિકાની વર્ષ 2021-22 ના બજેટની બેઠક મળી હતી. જેમાં ભાજપના 4 સભ્યો અને કોંગ્રેસનો 1 સભ્યો ગેરહાજર હતો.

વાર્ષિક બજેટનો મુદ્દો આવતાં કોંગ્રેસે મતદાનની માંગણી કરી હતી. પરિણામે 9 વિરૂદ્ધ 10 મતથી બજેટ નામંજૂર થયું હતું. સાથે છેલ્લા 3 માસના બીલ-વાઉચર પર મતદાન થતાં એ પણ નામંજૂર થયા હતા. જ્યારે શહેરના બીજા વિકાસ કામોના ઠરાવો સર્વાનુમતે મંજૂર કરાયા હતા. બજેટ બોર્ડમાં પ્રધાનમંત્રી આવાસ યોજનાનો મુદ્દો ચર્ચામાં લેવા માટેની દરખાસ્ત ગેરહાજર રહેલા સભ્યો રમેશભાઇ માંગરોલિયાની દરખાસ્ત હતી. જેને ચર્ચામાં લેવાનો સભ્યોનો સુર ઉઠ્યો હતો.

આ મામલે એવી દલીલ પણ થઇ હતી કે, બે માળવાળા અને પાકા મકાન ધરાવતા લોકોએ મકાન મંજૂર કરાવીને હપ્તા લીધા છે. તો મકાન બનાવ્યા નથી એવા લાભાર્થી પણ છે. અંતમાં આ દરખાસ્તને આગામી જનરલ બોર્ડમાં ચર્ચા માટે રાખવાનું નક્કી થયું હતું.