માંગ:વિસાવદર- બિલખા-જૂનાગઢ રોડ નવો બનાવવા માંગ ઉઠી, નાયબ મુખ્યમંત્રીને રજૂઆત કરતા જૂનાગઢના એડવોકેટ

ભેંસાણથી જૂનાગઢ સુધીના રોડ માટે 41.11 કરોડની રકમ મંજૂર કરાઇ છે. ત્યારે વિસાવદર- બિલખા-જૂનાગઢ રોડ નવો બનાવવા માટે પણ રકમ મંજૂર કરવા માંગ કરાઇ છે. આ અંગે જૂનાગઢના એડવોકેટ પ્રતિકભાઇ રાવલે નાયબ મુખ્યમંત્રી નિતીનભાઇ પટેલને પત્ર પાઠવી રજૂઆત કરી છે. રજૂઆતમાં જણાવાયું છે કે, વિસાવદર-બિલખા-જૂનાગઢ રોડ અત્યંત ખરાબ થઇ ગયો છે.

પરિણામે આ રોડ પરથી પસાર થતા હજ્જારો વાહન ચાલકોને ભારે મુશ્કેલી વેઠવી પડે છે. વળી, ખરાબ રસ્તાના કારણે 20 કિમીથી વધુની ઝડપે વાહન ચાલી શકતા ન હોય દર્દીઓને સમયસર હોસ્પિટલે પણ પહોંચાડી શકાતા નથી. જ્યારે ખરાબ રસ્તાના કારણે આ વિસ્તારના ખેડૂતોને પોતાની ખેત જણસ યાર્ડે પહોંચાડવામાં પણ મુશ્કેલી પડે છે.

આ રોડ પર યાત્રાધામો, હોસ્પિટલો, સ્કૂલો, કોલેજો વગેરે આવેલ હોય ખરાબ રસ્તાના કારણે તમામ લોકોને ભારે હાલાકીનો સામનો કરવો પડી રહ્યો છે. દરમિયાન ભેંસાણ-જૂનાગઢ રોડ માટે 41.11 કરોડ મંજૂર કરાયા છે ત્યારે વિસાવદર-બિલખા-જૂનાગઢ રોડ માટે પણ રકમ મંજૂર કરાવી આ રોડ નવો બનાવવા માંગ કરાઇ છે.