દેશી સ્પાઇડરમેન!:ગિરનારના જે ભૈરવ જપ શિખર પર જવાનો કોઈ રસ્તો જ નથી તેના પર કોઈ ટેકા વગર સડસડાટ ચઢી રહ્યો છે યુવક, વીડિયો વાઇરલ

જૂનાગઢ4 મહિનો પહેલા
  • સોશિયલ મીડિયામાં યુવાનને લોકો સ્વદેશી સ્પાઇડરમેનની ઓળખ આપી રહ્યા છે
  • વાઇરલ વીડિયોમાં નજરે પડી રહેલા યુવાનની હજી સુધી ઓળખ નથી થઈ

જૂનાગઢના ગરવા ગિરનારના ભૈરવ જપ શિખર પર જવાનો કોઈ રસ્તો જ નથી, ત્યાં જવું આસાન નથી. તેમ છતાં એક યુવક કોઈપણ જાતના ટેકા પર શિખર ચઢી-ઊતરી રહ્યો હોવાનો વીડિયો સોશિયલ મીડિયામાં વાઈરલ થયો છે. આ વીડિયો જોઈ સૌકોઈ આશ્ચર્યમાં મુકાઈ રહ્યા છે. જોકે હજી સુધી આ યુવકની ઓળખ થઈ શકી નથી. યુવક જ્યારે આ જોખમી ચઢાણ કરી રહ્યો હતો ત્યારે અન્ય પ્રવાસીઓએ આ દૃશ્યો કેમેરામાં કેદ કર્યાં હતાં, જે સોશિયલ મીડિયામાં વાઈરલ થયાં છે. આ યુવાને જીવના જોખમે કરેલા અખતરા અંગે લોકો તરેહ તરેહની ચર્ચા કરી રહ્યા છે.

હાલ એક-બે દિવસથી સોશિયલ મીડિયામાં જૂનાગઢના ગિરનારનું એક શિખર ચડતા યુવાનનો વીડિયો વાઈરલ થયો છે. એ અંગે જાણવા મળેલી વિગતોનુસાર જૂનાગઢના સ્પાઈડર મેન સ્વદેશી યુવાન ગિરનાર પર્વત પર, શિખર સડસડાટ ચઢી રહ્યો છે. આ શિખર પર ચડવા અને ઊતરવાની સમગ્ર ઘટના કોઈ અન્ય પ્રવાસીએ મોબાઈલમાં કેદ કરી હતી, એમાં ગિરનાર પર્વતના ભૈરવ શિખર પર ભારે પવન વચ્ચે એક યુવાન સડસડાટ ચડે છે અને થોડીવાર શિખર પર રહી ફરી પાછો નીચે ઊતર્યો હતો. આ શિખરની બાજુમાં જ હજારો ફૂટ ઊંડી ખાઈ હોઈ, જેમાં ખાબકવાના ડર રાખ્યા વગર યુવાન સડસડાટ ચડી-ઊતરી રહ્યો હતો.

હાલ આ વાઈરલ વીડિયોમાં જોખમી સ્ટંટરૂપી શિખર ચઢી ઊતરનાર યુવાન કોણ છે ? ક્યાંનો છે ? એની કોઈ જાણકારી હજુ સુધી સામે આવી નથી, પણ સોશિયલ મીડિયામાં લોકો યુવાનને ઇન્ડિયાનો સ્વદેશી સ્પાઈડર મેન નામ આપી તેના સ્ટંટની ચર્ચા કરી રહ્યા છે. આ વીડિયો રોચક હોવાથી લોકો મોટી સંખ્યામાં નિહાળી રહ્યા છે.

ભૈરવ જપ શિખર પર પ્રવાસીઓને જવાનો રસ્તો જ નથી
જાણવા મળતી વિગત મુજબ, ગિરનારમાં અનેક એવાં શિખરો છે, જ્યાં લોકોને જવા માટે પગથિયાં છે, પરંતુ સોશિયલ મીડિયામાં જે વીડિયો વાઈરલ થઈ રહ્યો છે એમાં જે ભૈરવ જપ શિખર જોવા મળી રહ્યું છે, એના પર જવા માટે કોઈ પગથિયાં જ નથી. ત્યાં કોઈ પ્રવાસીઓ જતા પણ નથી. એવા શિખર પર એક યુવક કોઈપણ જાતના ડર રાખ્યા પર ચઢાણ કરી રહ્યો છે એ આશ્ચર્યમાં મૂકનારું છે.

અન્ય સમાચારો પણ છે...