વાતાવરણ:લઘુત્તમ તાપમાન વધ્યુ, પરંતુ પવન વધતા ઠંડી બરકરાર રહી, જૂનાગઢ શહેરમાં 10.5, ગિરનાર પર 5.5 ડિગ્રી ઠંડી

જૂનાગઢ શહેરમાં લઘુત્તમ અને મહત્તમ તાપમાન વધ્યું હતું. ત્યારે ઠંડીની અસર ઘટવી જોઇએ. જોકે,પવનની ઝડપમાં વધારો થતા ઠંડીની અસર બરકરાર રહી હતી.જૂનાગઢ શહેરમાં મંગળવારે લઘુત્તમ તાપમાનનો પારો 7.8 ડિગ્રીએ પહોંચી જતા તેમજ પવનની ઝડપ 6.2 કિમી પ્રતિ કલાકની રહેતા હાજા ગગડાવતી ઠંડી પડી હતી. દરમિયાન બુધવારે મહત્તમ તાપમાન અને લઘુત્તમ તાપમાનમાં વધારો થયો હતો.

મંગળવારે લઘુત્તમ તાપમાન 7.8 ડિગ્રી હતું તેમાં બુધવારે 2.7 ડિગ્રીનો વધારો થઇ 10.5 ડિગ્રી થઇ ગયું હતું. બીજી તરફ મહત્તમ તાપમાન મંગળવારે 25.5 ડિગ્રી હતું જેમાં બુધવારે 1 ડિગ્રીનો વધારો થઇ 26.5 ડિગ્રી થઇ ગયું હતું. આમ, લઘુત્તમ તાપમાનમાં 2.7 ડિગ્રી અને મહત્તમ તાપમાનમાં 1 ડિગ્રીનો વધારો થતા ઠંડીમાં થોડો ઘટાડો થવો જોઇએ.

જોકે, પવનની ઝડપમાં વધારો થતા ઠંડીની અસર બરકરાર રહી હતી. મંગળવારે પવનની ઝડપ 6.2 કિલોમિટર પ્રતિ કલાકની હતી જેમાં બુધવારે 1.1 કિલો મિટરનો વધારો થતા દિવસભર 7.3 કિલો મિટરની ઝડપે બર્ફિલા પવન ફૂંકાતા શહેરમાં ઠંડીમાં ઘટાડો જોવા મળ્યો ન હતો. હજુ ગુરૂવારે પણ ઠંડીની અસર જોવા મળશે. દરમિયાન શહેરમાં 10.5 ડિગ્રી અને ગિરનારમાં 5.5 ડિગ્રી ઠંડી રહી હતી.