આરોપી ઝડપાયો:ઉનાની ચોરીના ગુનામાં 6 વર્ષથી ફરાર આરોપીને ઝડપી લેવાયો

ગીર સોમનાથના ઉનાની ચોરીના ગુનામાં 6 વર્ષથી ફરાર આરોપીને જિલ્લા નાસતા ફરતા સ્કોડની ટીમે મોરબી ખાતે ઝડપી લઈ ધોરણસરની કાર્યવાહી હાથ ધરી છે.

ગીર સોમનાથ પોલીસ સ્ટેશનોમાં નોંધાયેલ ગુનાઓના ફરાર આરોપીઓને ઝડપી લેવા પોલીસ અધિક્ષક રાહુલ ત્રિપાઠીએ નાસતા ફરતા સ્કોડની રચના કરી આરોપીઓને ઝડપી લેવા સૂચના આપી હતી. જે અનુસંધાને સ્કોડની ટીમએ શોધખોળ હાથ ધરતા ઉના પોલીસમાં 2015માં નોંધાયેલી ચોરીના એક ગુનાનો નાસતો ફરતો આરોપી મોરબીમાં હોવાની બાતમી મળી હતી.

બાતમીના આધારે સ્કોડની ટીમના પીએસઆઈ આર.આર.ગરચર સ્ટાફના સંજય પરમાર, એ.પી.જાની, ભીખુશા બચુશા સહિતનાએ મોરબી શહેરના કાંતીનગર વિસ્તારમાંથી ફરાર આરોપી જમાલશા રહેમાનશા શામદાર (ઉ.વ.50) વાળાને ઝડપી લઈ ઉના પોલીસને સોંપવાની તજવીજ હાથ ધરેલ છે. જમાલશા સામે ઉના પોલીસમાં 6 વર્ષ પૂર્વે ચોરીનો ગુનો નોંધાયેલ જેમાં તે ફરાર હતો.