વાતાવરણ:2 દિવસમાં ઠંડીમાં 5.6 ડિગ્રીના ઘટાડાથી લોકોને રાહત મળી

જૂનાગઢ શહેરમાં છેલ્લા 2 દિવસમાં ઠંડીમાં 5.6 ડિગ્રીનો ઘટાડો થતા લોકોને કાતીલ ઠંડીથી રાહત મળી છે. એટલું જ નહિ 2 દિવસ સુધી વાદળછાયું વાતાવરણ રહેવા સાથે ઠંડીમાં હજુપણ ઘટાડો થશે. આ અંગે મળતી વિગત મુજબ 31 જાન્યુઆરીએ લઘુત્તમ તાપમાન 6.7 ડિગ્રી રહેતા લોકો હાડથિજાવતી ઠંડીથી થરથર ધ્રુજી ઉઠ્યા હતા. જોકે, બાદમાં ઠંડીમાં ઘટાડો થઇ રહ્યો છે.

છેલ્લા 2 દિવસમાં લઘુત્તમ તાપમાન 5.6 ડિગ્રી વધી 12.3 ડિગ્રીએ આવી જતા લોકોને કડકડતી ઠંડીથી રાહત મળી છે. દરમિયાન હજુ પણ 2 દિવસ એટલે કે બુધ અને ગુરૂવારે શહેરમાં વાદળછાયું વાતાવરણ રહેવા સાથે ઠંડીમાં હજુપણ ઘટાડો થશે. દરમિયાન મંગળવારે લઘુત્તમ તાપમાન 12.3, મહત્તમ તાપમાન 32.5 ડિગ્રી રહ્યું હતું. જ્યારે ભેજનું પ્રમાણ સવારે 76 ટકા અને બપોર બાદ 23 ટકા રહ્યું હતું અને પવનની ઝડપ 2.8 કિમી પ્રતિ કલાકની રહેવા પામી હતી.