ડ્રાઈવરો બાખડ્યા:રસ્તા પર આ રીતે કેમ બસ ચલાવો છો કહી વેરાવળ એસટી ડેપોમાં એક ડ્રાઇવરે બીજા સાથે બોલાચાલી કરી

વેરાવળ એસટી ડેપોમાં બે ડ્રાઈવરો વચ્ચે બસ ચલાવવા બાબતે બોલાચાલી અને મારામારી થઇ હોવાની ઘટના સામે આવી છે. તમે રસ્તા પર આ રીતે કેમ બસ ચલાવો છો કહીં બોલાચાલી થઇ હોવાનું જાણવા મળ્યું છે. બનાવ અંગે બન્ને ડ્રાઈવરે એકબીજા સામે સામસામી ફરિયાદ નોંધાવતા પોલીસે આગળની કાર્યવાહી હાથ ધરી છે.

આ બનાવની પોલીસમાંથી પ્રાપ્ત વિગત મુજબ માળીયા હાટીના તાબાના ઇટાળી ગામે રહેતા અને એસ ટી માં ડ્રાઇવર તરીકે ફરજ બજાવતા વિરમલ દેવદાન સીસોદીયા ઉ.વ.46 તાલાલા થી વેરાવળ એસ ટી બસ લઇને આવી રહ્યાં હતા તે સમયે રસ્તામાં સેમરવાવ ગામ પાસે આગળની બસના ચાલકે ઓચિંતી બસ રોકી હતી. બન્ને બસ ચાલકો વેરાવળ ડેપોમાં મળતા રાજુભાઇ નિમાવત તથા અન્ય એક અજાણ્યા શખ્સે તમે રસ્તામાં બસ આ રીતે કેમ ચલાવો છો ? તેમ કહી ઉશ્કેરાઇ જઇ બીભત્સ શબ્દો બોલી માર મારી જાનથી મારી નાખવાની ધમકી આપી હોવાની ફરીયાદ નોંધાઈ છે.

સામે પક્ષે તાલાલા તાબાના બોરવાવ ગામે રહેતા અને એસ ટીમાં ફરજ બજાવતા રાજેશ જેન્તીભાઇ નિમાવત ઉ.વ.33એ પણ બસ ચલાવવાની બાબતે બોલાચાલી કરી બીભત્સ શબ્દો બોલી માર મારી જાનથી મારી નાખવાની ધમકી અપાઈ હોવાની ફરીયાદ નોંધાવતા પોલીસે બન્ને પક્ષની ફરિયાદ નોંધી વધુ તપાસ હે.કો. સંજયભાઇ સોલંકી એ હાથ ધરી છે.