આદેશ:પહેલો ગુનો હતો એટલે તલાટીને થપ્પડ મારનાર સરપંચને કોર્ટે છોડી મૂક્યા, જૂનાગઢ તાલુકાનાં પત્રાપસર ગામે 6 વર્ષ પૂર્વે ઘટના બની હતી

જૂનાગઢ તાલુકાના પત્રાપસર ગામે 6 વર્ષ પૂર્વે આ ઘટના બની હતી. પત્રાપસર ગામે ફરજ બજાવતા મહિલા તલાટી મંત્રી રાધિકાબેન જમનાદાસભાઇ કાલરીયાએ વર્ષ 2015માં સરકારી વાસ્મો યોજનાના જરૂરી ફોર્મમાં સહિ કરી પરત કરવા તત્કાલીન સરપંચ દામજીભાઇ ગોવિંદભાઇ દોંગાને 4 નકલો આપી હતી. ત્યારે સરપંચે 1 ફોર્મ પોતાની પાસે રાખી લીધું હતું.

તલાટી મંત્રીએ, ફોર્મ તમારી પાસે ન રખાઇ તેમ કહેતા સરપંચે ઉશ્કેરાઇ જઇ થપ્પડ મારી, ગાળો કાઢી જાનથી મારી નાંખવાની ધમકી આપી હતી. બાદમાં આ મામલે ફરિયાદ થતા જૂનાગઢની કોર્ટમાં કેસ થયો હતો. આ કેસ જૂનાગઢના ત્રીજા જ્યુડિશીયલ મેજીસ્ટ્રેટ અલ્પાબેન પ્રભુદાસ કડીવારની કોર્ટમાં ચાલી જતા કોર્ટે આરોપીને તકસીરવાન માની અને પ્રોબેશન ઓફ ઓફેન્ડર્સ એકટની જોગવાઇઓનો લાભ આપી છોડી મૂકવા હુકમ કર્યો છે. આ અંગે એડવોકેટ મનોજભાઇ દવેએ જણાવ્યું હતું કે, કોર્ટે આરોપીને તકસીરવાન ઠરાવ્યા છે, પરંતુ પ્રથમ ગુનો હોય અને ચાલ ચલગત સારી હોય પ્રોબેશન ઓફેન્ડર્સ એકટની જોગવાઇનો લાભ આપી છોડી મુક્યા છે.