ભારે થઇ, ભાગવું કઇ રીતે?:ગીરના જંગલમાં સિંહને જોઈને દીપડો ઝાડ પર ચઢી ગયો, સિંહ થોડો આઘોપાછો થતાં માંડ ભાગવાનો મોકો મળ્યો, ઘટના કેમેરામાં કેદ

ગિર જંગલમાં ઝાડ પર ઉભેલા દીપડા અને નીચે ઉભેલા સિંહ એકબીજા સામે જોઇને ઘૂરકિયાં કરતા હોય એવો ફોટો અને સાથે એક ઝાડ પરથી નીચે ઉતરીને ભાગતા દીપડાનો પીછો કરતા સિંહનો એક વીડિયો વાયરલ થયા છે. તાજેતરમાં જ બનેલી આ ઘટના ત્રણેક દિવસથી સોશ્યલ મીડિયામાં વાયરલ થઇ છે.

વાયરલ થયેલા ફોટો અને વીડિયો એકજ બનાવના છે કે જુદા જુદા એ કળવું જોકે મુશ્કેલ છે. પણ વીડિયો માંડ ત્રણેક દિવસ પહેલાંજ કમલેશ્વર ડેમ નજીક સવારના સમયનો હોવાની ચર્ચાઓ ઉઠી છે. વાત જાણે એમ હતી કે, એક દીપડાએ હરણનું મારણ કર્યા બાદ તેને આરોગે એ પહેલાં સિંહ આવી જતાં તેણે મેદાન છોડવું પડ્યું હતું. સિંહ દર્શન માટેના રૂટ નં. 1, 3, 4 અને 7 નજીકનો આ વિસ્તાર હોવાનું જાણકારોનું માનવું છે.