છેતરપિંડી:જીપીએસસી પરીક્ષાના ઉમેદવાર સાથે રૂપિયા13,500ની છેતરપિંડી

જીપીએસસીની પરીક્ષાના મહિલા ઉમેવાર સાથે 13,500ની છેતરપિંડી કરતા પોલીસે ક્લાસીસ સંચાલક પાસેથી આ રકમ ઉમેદવારને પરત અપાવી હતી. આ અંગે ડીવાયએસપી પ્રદિસિંહ જાડેજાએ જણાવ્યું હતું કે, રેન્જ ડીઆઇજી મનિન્દર પ્રતાપસિંહ પવાર અને એસપી રવિતેજા વાસમ શેટ્ટી દ્વારા પોલીસ પ્રજાનો મિત્ર છે તે સૂત્રને સાર્થક કરવા લોક કલ્યાણના કામો કરવા સૂચના આપી હતી. દરમિયાન મોતીબાગમાં રહેતી એક યુવતિએ જીપીએસસી ક્લાસ વનના ટ્યુશન માટે ઝાંઝરડા રોડ સ્થિત આઇસ ઇન્સ્ટિટ્યુટ ફોર કોમ્પિટિટિવ એક્ઝામ નામના ટ્યુશન કલાસીસમાં 13,500ની ફિ ભરી હતી.

જોકે, ફિ લીધા બાદ ટ્યુશન કલાસ સંચાલકે ક્લાસ શરૂ કર્યા ન હતા. એટલું જ નહિ 1 વર્ષ થવા છત્તાંં ફિ પણ પરત કરતો ન હતો. દરમિયાન મધ્યમ વર્ગિય યુવતિએ ડીવાયએસપી પ્રદિપસિંહ જાડેજાને જાણ કરતા આ અંગે બી ડિવીઝન પોલીસમાં જાણ કરાઇ હતી. બાદમાં બી ડીવીઝન પીઆઇ આર.બી. સોલંકી અને સ્ટાફે કલાસીસ સંચાલકને બોલાવી પોલીસની ભાષામાં સમજાવતા તેમણે ફિની લીધેલી પુરી રકમ પરત કરી આપી હતી.