ક્રાઇમ:પોલીસે પકડેલા પુત્રને ભગાડી જવા પિતાની નિષ્ફળ કોશીષ

13 મેનાં રોજ સાંજે 7:40 વાગ્યે મધુરમ બસ સ્ટોપ પાસે નદીમ ઉર્ફે વિકી મુન્નાભાઇ મીર (ઉ. 23) નામનો શખ્સ માસ્ક પહેર્યા વિના આંટાફેરા મારતો હોઇ પોલીસે બોલાવતાં તે એક્ટિવા પર ભાગવા લાગ્યો હતો. પોલીસે તેનો પીછો કરતાં તે પડી ગયો હતો. પોલીસે તેને પકડી પીસીઆર વાનમાં બેસવા કહેતાં બેસતો નહોતો. આથી તેને ઉંચકીને વાનમાં બેસાડી સી ડિવીઝન પોલીસ સ્ટેશને લાવતા હતા. એ વખતે તેના પિતા મુન્નાભાઇ ઇબ્રાહીમભાઇ મીર તેને છોડાવવા મોટરસાઇકલ પર આવ્યા હતા. તેણે પુત્રને વાનમાંથી કૂદી જવા કહેતાં નદીમે ભાગવાની કોશીષ કરી હતી. પરંતુ કોન્સટેબલ સંજયભાઇ ધીરજલાલ ચાવડાએ તેને પકડી ફરીથી બેસાડી દીધો. જ્યારે તેના પિતા મુન્નાભાઇ સોસાયટી વિસ્તારમાં નાસી છૂટ્યા હતા. બનાવ અંગે પોલીસે બંને પિતા-પુત્ર સામે ફરિયાદ નોંધાવી છે.