આપઘાત:કેશોદના પંચાળા ગામે પુત્રના મોતના આઘાતમાં ખેડૂત પિતાએ ઝેરી દવા પીને જીવન ટૂંકાવ્યું

કેશોદના પંચાળા ગામે પુત્રનું 4 માસ પહેલાં મૃત્યુ થયા બાદ તેના પિતા હજુ આઘાત જીરવી નહોતા શક્યા. આથી તેમણે પણ ઝેરી દવા પી લેતાં તેમનું પણ મોત નિપજ્યું હતું. જ્યારે વિસાવદરના શોભાવડલા (લશ્કર)માં પાકમાં છાંટેલી દવાની અસરથી યુવાન ખેડૂતનું મોત નિપજ્યું હતું.

જંતુનાશક દવા ગટગટાવી આપઘાત
પોલીસમાંથી પ્રાપ્ત વિગતો મુજબ, કેશોદ તાલુકાના પંચાળા ગામના મોહનભાઇ ગોવિદભાઇ મોકરીયા (ઉ. 50) નામના આધેડના પુત્ર ચેતનભાઇનું ચારેક માસ પહેલાં મૃત્યુ થયું હતું. જેનો આઘાત તેઓ જીરવી નહોતા શકતા. આથી તેમણે ગત તા. 12 નવે.ના રોજ રાત્રે 10 વાગ્યે પોતાને ઘેર ઝેરી દવા પી લેતાં તેમનું હોસ્પિટલમાં સારવાર દરમ્યાન મોત નિપજ્યું હતું. જ્યારે વિસાવદર તાલુકાના શોભાવડલા (લશ્કર) ગામના ભરતભાઈ ક્લ્યાણજીભાઈ ચાવડા (ઉ. 35) નામના યુવાન ખેડૂતે ખેતરમાં ઉભા પાકમાં જંતુનાશક દવાનો છંટકાવ કર્યો હતો. જેની અસર થઇ જતાં સારવાર માટે હોસ્પિટલે ખસેડાયા હતા. જ્યાં તેમનું મોત નિપજ્યું હતું.