ઉત્સાહ નો તહેવાર:શહેરમાં ઓછા સ્ટોલનાં કારણે શનિવારે જ ફટાકડા ખલ્લાસ, લોકોએ મનમૂકીને ખરીદી કરી તહેવારને મનાવ્યો

જૂનાગઢમાં અનેક સ્થળોએ ફટાકડાના નાના, મોટા સ્ટોલ લાગ્યા હતા. જોકે, શનિવાર બપોર બાદ મોટા સ્ટોલમાં ફટાકડા ખલ્લાસ થઇ ગયા હતા.લોકોએ મનમૂકીને દિવાળી તહેવારની ઉજવણી કરવા માટે ફટાકડાની ધૂમ ખરીદી કરતા આ સ્થિતી નિર્માણ પામી હતી. ચાલુ વર્ષે કોરોનાના કારણે તમામ તહેવારોની ઉજવણી થઇ શકી ન હતી. બાદમાં દિવાળીમાં એક માત્ર તહેવાર ઉજવી શકે તે માટે સરકારે આપેલી મંજૂરી બાદ લોકો તહેવારને ઉજવા માટેની પુરતી તૈયારી કરી લીધી હતી.

દરમિયાન શહેરમાં અનેક સ્થળોએ ફટાકડાનાં સ્ટોલ લાગ્યા હતાં. તેમા પણ મોટા સ્ટોલમાં સસ્તા ભાવે ફટાકડા વેંચાતા હોય ગ્રાહકોની લાઇન લાગી હતી. દરમિયાન શનિવારે બપોર બાદ જ મોટા તમામ સ્ટોલમાં ફટાકડા સ્ટોક ખલ્લાસ થઇ ગયો હતો. પરિણામે અનેક લોકોને ફટાકડા લેવા માટે અહીંતહી ભાગવું પડ્યું હતું.