પેટા ચૂંટણીનું પરિણામ:જૂનાગઢ મનપાની પેટાચૂંટણીમાં કૉંગ્રેસની એક બેઠક પર જીત થતા કૉંગ્રેસનું મનપામાં સંખ્યાબળ 2નું થયું

જૂનાગઢ મહાનગરપાલિકાની બે બેઠકોની પેટા ચૂંટણીના પરિણામમાં ભાજપ-કોંગ્રેસ બંન્‍ને પક્ષો એક - એક બેઠક જીતવામાં સફળ થયા છે. જેના પગલે જૂનાગઢ મહાનગરપાલિકામાં કોંગ્રેસનું સંખ્‍યાબળ બે પર પહોચ્‍યુ છે.

જૂનાગઢ મહાનગરપાલીકાના બે કોર્પોરેટરોના નિઘનથી ખાલી પડેલ બે બેઠકો પર પેટાચુંટણી યોજાઇ હતી. બંન્‍ને બેઠકો પર ભાજપ અને કોંગ્રેસ વચ્‍ચે સીઘી ટકકર હતી. જેનું બે દિવસ પૂર્વે રવિવારે મતદાન યોજાયુ હતુ. જેની આજે મતગણતરી યોજાઇ હતી. જેમાં વોર્ડ નં.15 ની બેઠકની ગણતરીમાં ભાજપના ઉમેદવાર નાગજીભાઇ કટારાને 4,449 મત, લાખાભાઇ પરમારને 2,841 મત, રાજેશ સોલંકીને 1,320 મત, દિપક મકવાણાને 197 મત અને નોટામાં 218 મતો પડેલ હતા. આમ, વોર્ડ નં.15 ને બેઠક પર ભાજપના ઉમેદવાર નાગજીભાઇ કટારાનો 1,608 મતોએ વિજય થયેલ હતો.

જયારે વોર્ડ નં.6 ની મત ગણતરીમાં ભાજપના અરવિંદભાઇ રામાણીને 2,645 મત, કોંગ્રેસના લલીતભાઇ પણસારાને 2,687 મત, પ્રવિણભાઇ વાઘેલાને 2,155 મત, ઘર્મેન્‍દ્રભાઇ ચાવડાને 100 મત, માલદેભાઇ ચાવડાને 31 મત અને નોટામાં 130 મતો પડેલ હતા. આમ, કોંગ્રેસના લલીતભાઇ પણસારા 42 મતે વિજય બનેલ હતા.