સિંહબાળનો મૃતદેહ મળ્યો:ગીર ગઢડાની બાબરીયા રેન્જમાંથી બાળસિંહનો મૃતદેહ મળી આવ્યો

ગીર સોમનાથ જીલ્લાના ગીરગઢડાની બાબરીયા રેંજની ઝાખિયા રાઉન્ડ બીટમાંથી સાતેક મહિનાનો સિંહબાળનો મૃતદેહ મળી આવ્યો છે. સિંહબાળ ઘાયલ થતા શ્વાસ લેવામાં તકલીફ થતા મૃત્યુ થયાનું વન વિભાગે અનુમાન દર્શાવ્યું છે. જો કે સિંહબાળના મોતનું કારણ જાણવા પીએમ કરાવવા તજવીજ હાથ ધરવામાં આવી છે.

જીલ્લાના ગીરગઢડાના બાબરીયા રેન્જની ઝાખિયા રાઉન્ડની બીટ વિસ્તારમાં ઝાંખિયા ડુંગર નજીકથી 6 થી 7 મહિનાની ઉંમરનો માદા સિંહબાળનો મૃતદેહ મળી આવ્યો છે. જેના પગલે સ્થળ પર વન અધિકારી ઓ સ્ટાફ સાથે દોડી જઇ તપાસ હાથ ધરી હતી.

તપાસમાં સિંહબાળ અન્ય વન્યપ્રાણી સાથે ઈનફાઈટ દરમ્યાન ઘાયલ થતા શ્વસનતંત્રમાં ખામીને સર્જાઈ હતી. જેના લીધે સિંહબાળને શ્વાસ લેવામાં તકલીફ થતા મૃત્યુ થયું હોવાનું વન વિભાગના અધિકારીઓએ અનુમાન વ્યક્ત કર્યું છે. જો કે, મૃત્યુનું સાચું કારણ જાણવા સિંહબાળના મૃતદેહને પીએમ અર્થે લઈ જવા તજવીજ હાથ ધરવામાં આવી છે.