ચુકાદો:મુખ્ય આરોપીને જામીન, તો મને પણ આપોની દલીલ કોર્ટમાં ન ચાલી

જૂનાગઢના બુટલેગરનો દારૂ કેશોદ પાસે એક ગોડાઉનમાંથી પકડાયો હતો. ગોડાઉન તેણે ખોટા નામે ભાડે રાખ્યું હતું. આ ગુનામાં કોર્ટે તેની જામીન અરજી ફગાવી દીધી છે. જૂનાગઢના સમીર ડોસાભાઇ કોડિયાતર (ઉ. 32), રવિ હમીર ભારાઇ અને યોગેશ હરજીવનભાઇ ગોંડલિયાએ અગતરાયના પાટિયાથી કેશોદ તરફ જતા એક કારખાનાને પશુઆહારના ગોડાઉન તરીકે ભાડે રાખ્યું હતું. જેમાં રવિની અટક ભારાઇને બદલે ભરાડ લખાવી હતી. બાદમાં એ ગોડાઉનમાં રૂ. 62.11 લાખનો દારૂ ભર્યો હતો. આ ગુનામાં પોલીસે સમીરને પકડી જેલ હવાલે કર્યો છે.

તેણે જામીન અરજીમાં એવી દલીલ કરી કે, આ ગુનાના મુખ્ય આરોપી ધીરેન અમૃતલાલ કારિયા અને વિપીન ઉર્ફે વિક્કી રાજપાલસિંહને હાઇકોર્ટે જામીન પર મુક્ત કર્યા છે. આથી પોતાને પણ જામીન પર છોડવામાં આવે. જોકે, સરકારી વકીલ એન. કે. પુરોહિતે એવી દલીલ કરી હતી કે, જે આરોપીઓને હાઇકોર્ટે મુક્ત કર્યા છે તેમના નામો ફરિયાદમાં નથી. આથી પેરિટીનો સિદ્ધાંત આરોપીને મળી શકે નહીં. આથી કેશોદના એડી. સેશન્સ જજ ટી. ડી. પડીઆએ આરોપીની જામીન અરજી ફગાવી દીધી હતી.