વાતાવરણમાં પલટો:એક જ દિ'માં ઠંડીમાં વધુ 3 ડિગ્રીનો ઘટાડો, જૂનાગઢ શહેરમાં બેવડી ઋતુનો થઇ રહ્યો છે અનુભવ, આગામી દિવસોમાં ગરમી વધી શકે તેવી સંભાવના

જૂનાગઢ શહેરમાં હવે લોકોને બેવડી ઋતુનો અનુભવ થઇ રહ્યો છે. સાથે એક જ દિવસમાં લઘુત્તમ તાપમાનમાં વધુ 3 ડિગ્રીનો વધારો થતા ઠંડીની અસરમાં નોંધપાત્ર ઘટાડો થયો છે. શહેરમાં હાલ લોકોને મિશ્રઋતુનો અનુભવ થઇ રહ્યો છે.

ખાસ કરીને રાત્રીના 8 થી સવારના 9 વાગ્યા સુધી વાતાવરણમાં થોડી ઠંડક અનુભવાય છે, જ્યારે બાકીના સમયે ઉનાળા જેવું વાતાવરણ રહે છે. એમાંયે બપોરના સમયે તો મહત્તમ તાપમાન 30 ડિગ્રી આસપાસ પહોંચી જતા લોકોને ગરમીથી બચવા પંખાનો સહારો લેવો પડી રહ્યો છે. દરમિયાન રવિવારે લઘુત્તમ તાપમાન 13.1 ડિગ્રી હતું જેમાં એક જ દિવસમાં 3 ડિગ્રીનો વધારો થઇ સોમવારે 16.1 ડિગ્રીએ પહોંચી જતા ઠંડીમાં 3 ડિગ્રીનો ઘટાડો નોંધાયો હતો.

જ્યારે મહત્તમ તાપમાનનો પારો પણ 29.9 ડિગ્રીએ આવી જતા બપોરે ગરમી અનુભવાઇ રહી છે. હજુ પણ આગામી દિવસોમાં ગરમી વધી શકે તેવી સંભાવના કૃષિ યુનિવર્સિટી હવામાન વિભાગ દ્વારા વ્યકત કરાઇ છે.