હુમલો:જૂનાગઢ જેલમાં કેદીએ જેલકર્મીને માર માર્યાની પોલીસમાં ફરિયાદ

જૂનાગઢ જેલમાં એક કેદીને બેરેકમાં બંધ કરતી વખતે તેની પાસે શંકાસ્પદ વસ્તુ હોવાનું જેલકર્મીને જણાયું હતું. આથી તેણે ઝડતી લેતાં કેદીએ તેને માર માર્યો હતો. પોલીસમાંથી પ્રાપ્ત વિગતો મુજબ, જૂનાગઢ જેલના કેદી ફઈમ ઉર્ફે સુલતાન જાવેદભાઈ કામદાર પાસે તા. 25 ડિસે.ના રોજ સાંજે 6:45 વાગ્યે જેલ બંધી સમયે પ્રતિબંધિત ચીજ વસ્તુ હોવાની શંકા જેલ સહાયક હિંમતસિંહ નાથાભાઈને ગઇ હતી. આથી તેની ઝડતી લીધી હતી. પરિણામે ફઇમ ઉશ્કેરાયો હતો. અને હિંમતસિંહને ગાળો દઇ મારી નાંખવાની ધમકી આપી વર્દીનો કોલર ખેંચતાં તે ફાટી ગઇ હતી.

હિંમતસિંહે તેની સામે એ ડિવીઝન પોલીસમાં ફરિયાદ નોંધાઇ છે. જૂનાગઢ જેલ વારંવાર કોઇને કોઇ કારણથી ચર્ચામાં રહે છે તાજેતરમાં જેલમાંથી મોબાઇલ ફોન પણ મળી આવ્યા હતા. મોબાઇલ ફોન મળવાની ઘટનાઓતો અહીં અવાર-નવાર બનતી રહે છે પરંતુ તેના અંત સુધી તંત્ર પહોંચતુ નથી.