વાતાવરણ:વધુ 1 ડિગ્રીના ઘટાડા સાથે 4 દિ' માં ઠંડીમાં 7.2 ડિગ્રીનો ઘટાડો, જૂનાગઢ શહેરમાં 13.9, ગિરનારમાં 8.9 ડિગ્રી ઠંડી

જૂનાગઢ શહેરમાં વધુ 1 ડિગ્રીના ઘટાડા સાથે છેલ્લા 4 દિવસમાં ઠંડીમાં 7.2 ડિગ્રીનો ઘટાડો નોંધાયો છે. દરમિયાન શિયાળાની ઋતુ પૂર્ણ થવામાં હોય તેમ ગરમ વસ્ત્રોનું વેંચાણ કરનારા ફેરીયાઓએ ઉચાળા ભરી લીધા છે. આ અંગે મળતી વિગત મુજબ જૂનાગઢ શહેરમાં 31 જાન્યુઆરીના રોજ 6.7 ડિગ્રી ઠંડી પડી હતી. જોકે, બાદમાં ફેબ્રુઆરી માસ બેસતાની સાથે જ ઠંડીમાં ઘટાડો થઇ રહ્યો છે. છેલ્લા 4 દિવસમાં લઘુત્તમ તાપમાન 6.7 ડિગ્રીથી વધીને 13.9 ડિગ્રીએ પહોંચી જતા ઠંડીમાં 7.2 ડિગ્રીનો ઘટાડો નોંધાયો છે.

દરમિયાન ઠંડી સતત ઘટી રહી હોય શહેરમાં શિયાળાની વિદાય ગણીને સક્કરબાગ સામે ગરમ વસ્ત્રોનું વેંચાણ કરતા ફેરીયાઓએ પણ ઉચાળા ભરી લીધા છે. દરમિયાન જૂનાગઢ શહેરમાં 13.9 અને ગિરનાર પર 8.9 ડિગ્રી ઠંડી રહી હતી. શહેરમાં ગુરૂવારે લઘુત્તમ 13.9, મહત્તમ 29.6 ડિગ્રી તાપમાન રહ્યું હતું. જ્યારે ભેજનું પ્રમાણ સવારે 85 ટકા અને બપોર બાદ 32 ટકા રહ્યું હતું તેમજ પવનની ઝડપ 4.4 કિમી પ્રતિ કલાકની રહેવા પામી હતી.