દંડ:માસ્ક ન પહેરનાર 118 પાસેથી રૂા. 1,18,000નો દંડ વસુલાયો, કોરોના ગાઇડ લાઇનનું ઉલ્લંઘન કરનાર સામે તવાઇ

કોરોના મહામારીને લઇ જિલ્લા કલેકટર ડો. સૌરભ પારધી દ્વારા જાહેરનામું બહાર પાડવામાં આવ્યું છે. આ જાહેરનામા મુજબ માસ્ક ન પહેરનાર તેમજ સોશ્યલ ડિસ્ટન્સનો ભંગ કરનાર સામે કડક કાર્યવાહી કરવા સૂચના અપાઇ છે. ત્યારે રેન્જ ડીઆઇજી મનિન્દર પ્રતાપસિંહ પવાર અને એસપી રવિતેજા વાસમ શેટ્ટીની સૂચના અને ડીવાયએસપી પ્રદિપસિંહ જાડેજાના માર્ગદર્શનમાં પોલીસ દ્વારા કડક ચેકીંગ કરવામાં આવી રહ્યું છે.

ખાસ કરીને તાલુકા પોલીસ સ્ટેશનના ઇન્ચાર્જ પ્રોબેશ્નલ આઇપીએસ વિશાખા ડબરાલ, એ ડિવીઝન પીઆઇ આર.જી. ચૌધરી, બી ડિવીઝન પીઆઇ આર.બી. સોલંકી, સી ડિવીઝન પીએસઆઇ કે.એસ. ડાંગર, પીએસઆઇ એસ.એન. સગારકા અને સ્ટાફ દ્વારા શહેરમાં ચેકીંગ હાથ ધરાયું હતું. દરમિયાન માસ્ક વગર ફરતા 118 લોકોને પકડી પાડી તેમની પાસેથી 1,18,000નો દંડ વસુલ કરવામાં આવ્યો છે. જ્યારે સોશ્યલ ડિસ્ટન્સનો ભંગ કરનાર 9 લોકોની ધરપકડ કરી તેની સામે ધોરણસરની કાર્યવાહી કરવામાં આવી છે.