પાકને નુકસાન:માળિયા હાટીના તાલુકામાં કેસર કેરીનાં આંબે સફેદ ફૂગનો ઉપદ્રવ

માળિયા હાટીનાનાં અમરાપુર ગામે મોટાભાગના ખેડૂતો કેસર કેરીના બગીચા ધરાવે છે. આ વર્ષે આંબાના ઝાડ પર મોરની આવક પણ મોટી માત્રામાં હોવાથી ખેડૂતોને પાક સારો થવાની આશા હતી. પરંતુ ખેડૂતો ઉપર ફરી આફતનો ઓછાયો હોય એવી સ્થિતી ઉભી થઇ છે. આંબાના ઝાડમાં સફેદ ફૂગનો ઉપદ્રવ વધતાં મોર બળવા લાગ્યા છે.

માળિયા હાટીના તાલુકાના અમરાપુર ગામે કેસર કેરીના આંબાવાડિયામાં સફેદ ફૂટને લીધે કેરીનું ખાખડીના રૂપમાં થતું બંધારણ બળી જવાના કારણે કેસર કેરીનો પાક નિષ્ફળ જવાની ભીતિ સેવાઈ રહી છે. છેલ્લા 2 વર્ષથી ખેડૂતો ઉપર જાણે કે કુદરત રૂઠી હોય તેવી રીતે દરેક પાક ઉપર કોઈને કોઈ આફતના ઓછાયા પથરાય છે. આથી ખેડૂતોને ભારે મુશ્કેલી વેઠવી પડે છે. અમરાપુરના ખેડૂત અશોકભાઇ ભંભાણાના જણાવ્યા પ્રમાણે આંબાના બગીચામાં સફેદ ફૂગ આવવાના કારણે જંતુનાશક દવાનો છંટકાવ કરવામાં આવ્યો છે. પણ કોઈ વળતર મળતું નથી.

શું કહે છે સ્થાનિક કૃષિ નિષ્ણાંત?
અમરાપુરનાજ કૃષિ નિષ્ણાત રસીકભાઇ કોદાવાલાના જણાવ્યા પ્રમાણે જંતુનાશક દવાના ઉપયોગની સાથે ઓર્ગેનિક પદ્ધતિ આપનાવવા ખેડૂતોને માર્ગદર્શન આપવામાં આવે છે.