લોકોના સ્વાસ્થ્ય પર જોખમ:કનસુમરામાં દુષિત પાણીના તલાવડાથી ગ્રામજનો લાલઘૂમ

જામનગર નજીકના કનસુમરા ગામમાં ઔદ્યોગિક એકમોનો દુષિત પાણીનો જાહેરમાં નિકાલ કરાતા ત્યાં કેમિકલ યુકત પાણીના તલાવડા બની ગયા છે. જયારે આ વિસ્તારના પાણીના તળ પણ ખરાબ થઇ જતાં લોકોમાં રોષ છે અને તંત્ર પાસે કડક પગલા ભરવાની માંગ કરાઇ છે.

જામનગર પાસેના કનસુમરા ગામમાં ઔદ્યોગિક એકમો આવેલા છે, આ એકમોમાંથી નિકળતા દુષિત કેમિકલ યુકત પાણીનો યોગ્ય નિકાલ કરવાના બદલે તેને જાહેરમાં છોડી દેવામાં આવે છે. જેના કારણે કનસુમરા ગામ અને તેના આજુબાજુના વિસ્તારોમાં કેમિકલયુકત લીલા કલરના પાણીના તલાવડા બની ગયા છે. જે જમીનમાં ઉતરતા ત્યાંના તળ પણ દુષિત થઇ ગયા છે જેના કારણે લોકોને પારાવાર મુશ્કેલીનો સામનો કરવો પડે છે. આ અંગે અવાર-નવાર રજૂઆત કરવા છતાં પ્રદુષણ વિભાગ કે અન્ય તંત્ર આ બાબતને ગંભીરતાથી લેતું નથી, જેના કારણે લોકોનો સ્વાસ્થ્ય પર ગંભીર અસર થાય તેવી સંભાવનાઓ દર્શાવવામાં આવી રહી છે.

દુષિત પાણીનો અહેવાલ વડી કચેરીને મોકલાવ્યો છે
કનસુમરા ગામમાં દુષિત પાણી અંગેની ફરિયાદ અમને મળી હતી, અમે તપાસ કરતા તે ઔદ્યોગિક એકમોમાંથી છોડાતું પાણી નજરે પડયું હતું અને તેના સેમ્પલ લઇ લેબોરેટરીમાં મોકલી તપાસ કરાવતા તે દુષિત હોવાનું સામે આવતા વડી કચેરીને આ અંગે પગલા લેવા જણાવ્યું છે.> એ.ડી. ભીમાણી, પ્રાદેશિક અધિકારી, જીપીસીબી, જામનગર.