મુલાકાત:108 એમ્બ્યુલન્સના ઓપરેશન હેડે જામનગર શહેર-જિલ્લામાં દોડતી 18 એમ્બ્યુલન્સના સ્ટાફ સાથે વાર્તાલાપ કર્યો

ગુજરાત રાજ્યમાં108 એમ્બ્યુલન્સની સેવા અવિરત ચાલી રહી છે, અને દર્દીઓને તાત્કાલિક સારવાર મળી રહે તે માટે જામનગર જિલ્લામાં 18 જેટલી એમ્બ્યુલન્સ દોડી રહી છે. જેના ઓપરેશન હેડ દ્વારા આજે જામનગરની મુલાકાત લેવામાં આવી હતી, અને 108 ના કર્મચારીઓ સાથે વાર્તાલાપ કરી તેઓની કામગીરીની વિગતો મેળવી હતી.

જામનગર, દ્વારકા અને મોરબી સહિતની 108ની એમ્બ્યુલન્સના ઓપરેશન હેડ સતીશ પટેલ, કે જેઓ આજે જામનગરની મુલાકાતે આવી પહોંચ્યા હતા, અને જામનગર શહેર -જિલ્લામાં દોડતી 18 જેટલી 108 એમ્બ્યુલન્સના કર્મચારીઓ સાથે વાર્તાલાપ કરીને તેઓની કામગીરી વિશેની માહિતી મેળવી હતી, સાથો સાથ તેઓ દ્વારા સરકારી જી.જી. હોસ્પિટલ તેમજ શહેરના અન્ય વિસ્તારોમાં કરવામાં આવી રહેલી કામગીરીનું નિરીક્ષણ કર્યું હતું, અને તમામ કર્મચારીઓને પ્રોત્સાહિત કર્યા હતા.

જામનગર શહેર જિલ્લામાં કોઈપણ પ્રકારના તહેવારો વગેરેમાં રજા રાખ્યા વિના 108ની ટીમ ખડે પગે રહે છે, અને દર્દીઓને તાત્કાલિક સારવાર માટે પહોંચાડવામાં ખૂબ જ મદદરૂપ બને છે. જામનગર શહેર જિલ્લાની જનતાને જ્યારે પણ જરૂર પડે ત્યારે 108 નંબરની એમ્બ્યુલન્સની મદદ લેવા સતીશ પટેલ દ્વારા અનુરોધ કરાયો.