વિવાદ:જમવાનું તો ખૂટી પડ્યું, ઉપરથી અધિકારીની ગેરવર્તણૂંકથી કર્મચારીઆેનો ભારે હોબાળો

જામ્યુકોની ચૂંટણીમાં વોર્ડ નં.1 થી 4 ના રીસીવીંગ અને ડીસ્પેચીંગ સેન્ટરમાં જમવાનું ખૂટી પડતાં ચૂંટણી ફરજમાં રોકાયેલા કર્મચારીઓ ભારે ધંધે લાગ્યા હતાં. અધિકારીએ કર્મચારી સાથે ગેરવર્તણૂંક કરતા કર્મચારીઓએ દેકારો બોલાવ્યો હતો.મનપાની ચૂંટણીમાં રવિવારે મતદાન થયું હતું. આ દરમ્યાન વોર્ડ નં 1 થી 4 માટે ડીકેવી કોલેજ ખાતે રીસીવીંગ અને ડીસ્પેચીંગ સેન્ટર રાખવામાં આવ્યું હતું. આ ચાર વોર્ડ માટે રીસીવીંગ અને ડીસ્પેચીંગની કામગીરીમાં રોકાયેલા કર્મચારીઓ માટે બપોરના ભોજનની વ્યવસ્થા સંલગ્ન અધિકારીઓ દ્વારા કરવામાં આવી હતી.

પરંતુ ભોજન ખૂટી પડતાં ચૂંટણી ફરજમાં રોકાયેલા કર્મચારીઓ ભારે ધંધે લાગ્યા હતાં. આટલું જ નહીં મતદાન દરમ્યાન એક અધિકારીએ કર્મચારી સાથે ગેરવર્ણતૂંક કરી હતી. આથી અન્ય કર્મચારીઓમાં ભારે રોષની લાગણી ફેલાઇ હતી. આટલું જ નહીં કર્મચારીઓ ગેરવર્ણતૂંક કરનાર અધિકારી પાસે દોડી ગયા હતાં અને ઉગ્ર રજૂઆત કરી હતી. જો કે, અધિકારી ઢીલા ઢફ થતાં મામલો થાળે પડયો હતો.