રોષ:આયુર્વેદ ક્ષેત્રના તબીબોને સર્જરીની છૂટનાે વિરોધ જામનગરમાં 20 તબીબો દ્વારા પ્રતીક ઉપવાસ આંદોલન

આયુર્વેદના તબીબોને સર્જરી કરવાની છૂટ આપવામાં આવી છે તેના વિરોધમાં દેશભરના તબીબોમાં વિરોધ ફાટી નીકળ્યો છે ત્યારે ઈન્ડિયન મેડિકલ એસોસિએશન દિલ્હીની સૂચના મુજબ ગુરૂવારથી 14 દિવસ સુધી વારાફરતી ઉપવાસમાં ઉતરવાનો ડોક્ટરનો કાર્યક્રમ ગુરૂવારે જામનગરમાં શરૂ થયો છે જેમાં પ્રથમ ભૂખ હડતાલમાં 20 તબીબો જોડાયા છે.

આયુર્વેદ તબીબોને સર્જરી કરવાની સરકારે મંજુરી આપી હતી. જેના વિરોધમાં ઈન્ડિયન મેડિકલ એસોસિએશન દ્વારા પ્રતીક ઉપવાસ આંદોલન ચલાવવામાં આવી રહ્યા છે. જામનગરમાં પણ ગુરૂવાર 20 તબીબો હડતાલમાં જોડાયા હતાં. જામનગરમાં આઈએમએના નેજા હેઠળ એસટી ડેપો પાછળ, હોસ્પિટલમાં તબીબોએ પ્રતીક ઉપવાસ આંદોલન કર્યું હતું. જેમાં ડો. વિજય પોપટ, ડો. પ્રશાંત તન્ના, ડો. તલસાણિયા, ડો. દિયા ભગદે સહિતના 20 તબીબો ઉપસ્થિત રહ્યા હતાં અને સરકારના નિર્ણય સામે વિરોધ પ્રદર્શન કર્યું હતું.