વિરોધ:જામનગરની ખાનગી હોસ્પિટલો 11મીએ બંધ

સેન્ટ્રલ કાઉન્સીલ ઓફ ઇન્ડીયન મેડીસીને આયુર્વેદ છાત્ર એલોપેથીમાં અનુસ્નાતક થઇ ઓપરેશન કરી શકે તે જાહેરાત જનઆરોગ્ય સાથે ચેડા હોવાનું જણાવી એલોપેથી અને આયુર્વેદની ખીચડીના વિરોધમાં ભારતની સાથે જામનગરની એલોપેથી હોસ્પિટલ 11 ડીસેમ્બરના બંધ રહેશે. જો કે, ઇમરજન્સી અને કોવીડ સારવાર ચાલુ રહેશે.

જામનગર ઇન્ડીયન મેડીકલ એસોસીએશને નિવેદનમાં જણાવ્યું છે કે, અત્યાર સુધી ભારતમાં આરોગ્યને લગતી જુદી જુદી પ્રકારની આયુર્વેદ, હોમિયોપેથી, નેરોપેથી, એલોપેથીની સારવાર પધ્ધતિ હોય બધી શાખાના તબીબો પોતાના વિજ્ઞાન અનુસાર દર્દીઓની સારવાર કરતા હતાં. ગત તા.19 નવેમ્બરના સેન્ટ્રલ કાઉન્સીલ ઓફ ઇન્ડીયન મેડીસીનએ બહાર પાડેલા જાહેરનામા અનુસાર આયુર્વેદ સ્નાતક વિધાર્થી એલોપેથીમાં પોસ્ટ ગ્રેજયુએટ કરી જુદા-જુદા ઓપરેશન કરી શકશે તેવી જાહેરાત કરી છે.

આથી સીસીઆઇએમે બહાર પાડેલા જાહેરનામાંના વિરોધમાં આગામી તા.11 ડીસેમ્બરના સવારે 6 થી સાંજે 6 વાગ્યા સુધી ભારતની એલોપેથી હોસ્પિટલો દર્દીની રૂટીન સારવાર માટે બંધ રહેશે. જેમાં જામનગરની હોસ્પિટલો જોડાશે. ફકત ઇમરજન્સી અને કોવીડ સારવાર ચાલુ રહેશે.