ઇ-ઇપીક ઝુંબેશ:ફોન અને લેપટોપમાં પણ હવે ચૂંટણીકાર્ડ સાચવી અને સુધારો પણ કરાવવાની સુવિધા

ભારતીય ચૂંટણીપંચ દ્વારા ચાલી રહેલી ઇ-ઇપીક ઝુંબેશ અંતર્ગત કોઈપણ વ્યક્તિ પોતાના યુનિક મોબાઈલ નંબર પરથી પોતાનું ચૂંટણીકાર્ડ ફોન અથવા તો લેપટોપમાં ડાઉનલોડ કરી પ્રિન્ટ કાઢી શકશે. ઇ-ઇપીક કાર્ડમાં મતદાતાને કોઈ વિગતમાં સુધારો કરવાની આવશ્યકતા હોય તો તે અંગે જરૂરી દસ્તાવેજો ઉમેરી સુધારા અરજી પણ કરી શકશે.

આ અંગે પત્રકાર પરિષદમાં જિલ્લા કલેકટર રવિશંકરે જણાવ્યું હતું કે, ઇ-ઇપીક એટલે કે મતદાતા ડિજિટલ ફોર્મેટમાં પોતાના ફોનમાં પોતાનું ચુંટણીકાર્ડ સાચવી શકે છે.આ માટે વોટર હેલ્પલાઇન મોબાઇલ એપ અથવા તો voterportal.eci.gov.in, nvsp.in પોર્ટલ પરથી ઈ-ઈપીક કાર્ડ ડાઉનલોડ કરી શકાશે. આ માટે પ્રથમ પોર્ટલ ઉપર રજીસ્ટર અથવા તો લોગીન કરી મતદાતાએ પોતાના એપિક નંબર અને સાથે જ રેફરન્સ નંબર નાખવાનો રહેશે. ત્યારબાદ મતદાતાના રજિસ્ટર્ડ મોબાઇલ નંબર ઉપર ઓટીપી આવશે જેને વેરીફાઈ કર્યા બાદ ઇ-ઇપીક કાર્ડ ડાઉનલોડ થઇ જશે. જો કોઈ મતદાતાના યુનિક મોબાઈલ નંબર ન હોય તો અથવા તો તે અંગે કેવાયસી ન કરાવ્યું હોય તો kyc.eci.gov.in પરથી કેવાયસી પૂર્ણ કરી ત્યારબાદ ફેસ લાઇવનેસ વેરિફિકેશન કર્યા બાદ પોતાનો યુનિક મોબાઈલ નંબર કેવાયસીમાં અપડેટ કરો.

આ ત્રણ પગલાઓ દ્વારા જે મતદાતાઓના યુનિક મોબાઇલ નંબર કેવાયસીમાં અપડેટ થશે. તદ ઉપરાંત, જે મતદાતાઓ યુનિક મોબાઇલ નંબર ધરાવતા નથી તેઓ ફેસ રેકોગ્નીશન દ્વારા કેવાયસી કરી મોબાઇલ નંબર ઉમેરી ઇ-ઇપીક ડાઉનલોડ કરી શકશે. તા.25 થી 31 સુધી યુનિક નંબર ન ધરાવતા મતદારોની ઇ-ઇપીકમાં નોંધણી ચાલુ છે ત્યારબાદ ફેબ્રુઆરી માસથી દરેક મતદારો માટે આ પ્રક્રિયા ખુલ્લી મુકવામાં આવશે.