કાર્યવાહી:દરેડના લેન્ડ ગ્રેબિંગ પ્રકરણમાં વધુ એક આરોપી શિક્ષકની ધરપકડ

જામનગરની ભાગોળે દરેડ પંથકમાં સરકારી જમીન પર પેશકદમી મામલે પંચ બી પોલીસમં 64 સામે ગુનો નોંધાયો હતો જેમાં વધુ એક આરોપી શિક્ષકની સોમવારે પોલીસે અટકાયત કરી લીઘી હતી જે પ્રકરણમાં અત્યાર સુધીમાં ધરપકડનો આંક 49 પર પહોચ્યો છે. જયારે અન્ય આરોપીની શોધખોળ સાથે પોલીસે તપાસ આગળ ધપાવી છે. ચકચારી પ્રકરણની પોલીસ તપાસ દરમિયાન વધુ 66ની સંડોવણી પણ ખુલવા પામી છે. જામનગરની ભાગોળે દરેડ પંથકમાં સર્વે નં.131 અને 132 વાળી સરકારી જમીન પર ગેરકાયદેસર દબાણ કરી પેશકદમી કરવાના મામલે અગાઉ પંચ બી પોલીસ મથકમાં 64 સામે ગુનો નોંધાયો હતો.

જેમાં પોલીસે જે તે સમયે સુત્રધાર વિજય માલાણીને પકડી પાડી તેના રીમાન્ડ મેળવી પુછપરછ હાથ ધરી હતી.જે પોલીસ પુછપરછમાં ભુમાફિયા જયેશ પટેલની સંડોવણી પણ ખુલી હતી. આ ચકચારી પ્રકરણમાં સમયાંતરે પોલીસે 48 આરોપીની ધરપકડ કરી હતી જે તમામને જેલહવાલે કરાયા હતા.

જે દરમિયાન ગ્રામ્ય ડીવાયએસપી કૃણાલ દેસાઇના નેતૃત્વમાં આ તપાસ આગળ ધપાવતા પોલીસ ટુકડીએ વધુ એક આરોપી શિક્ષક અબ્દુલભાઇ આમદભાઇ કોરેજા(રે.દરેડ મસીતીયા રોડ, આલ્ફા સ્કુલ સામે,મસ્જીદની પાછળ)ની ધરપકડ કરી લીઘી હતી આમ, આ પ્રકરણમાં અત્યાર સુધીમાં ધરપકડનો આંક 49 પર પહોચ્યો છે.જયારે પોલીસ તપાસમાં એક વકિલ સહિતના વધુ 66ની પણ સંડોવણી ખુલી હતી. પોલીસે અન્ય આરોપીઓની શોધખોળ સાથે તપાસનો દૌર આગળ ધપાવ્યો છે.