ભારે અરેરાટી:જામજોધપુરના મેથાણ ગામે દારૂ પીવાની ટેવથી કંટાળી યુવાને જીવતર ટૂંકાવી લીધુ

જામજોધપુરના મેથાણ ગામે યુવાને દારૂ પીવાની ટેવથી કંટાળી જીવન ટૂંકાવી લેતા ચકચાર જાગી છે. મજૂરી કામ કરતા યુવાને ઝેરી દવા પી લેતા સારવારમાં દમ તોડયો હતો. બનાવ અંગે પોલીસે અકસ્માત મોતનો ગુનો નોંધી તપાસ હાથ ધરી છે. મેથાણ ગામમાં રહેતાં અને મજુરીકામ કરતા ગીરીશભાઈ મુળજીભાઈ રાઠોડ નામના 38 વર્ષના યુવાનને દારૂની લત લાગી હતી. જેના કારણે તેમના પરિવારજનો અવારનવાર આ ટેવ છોડવા સમજાવતા હતાં.

પરંતુ દારૂની આદતથી કંટાળી ગયેલા ગિરીશભાઈએ મંગળવારે સવારે દારૂ પીધા પછી ઝેરી દવા પણ ગટગટાવી લીધી હતી. જેની પરિવારને જાણ થતાં ગિરીશભાઈને સારવાર માટે હોસ્પિટલ ખસેડાયો હતો. જયાં યુવાનનું સારવાર દરમ્યાન બુધવારે મૃત્યુ નિપજયું છે. બનાવ અંગે મૃતકના પિતા મૂળજીભાઈ આલાભાઈ રાઠોડે પોલીસને જાણ કરી હતી. આથી પોલીસે મૃતદેહનો કબ્જો સંભાળી અકસ્માત મોતનો ગુનો નોંધી તપાસ હાથ ધરી છે.