સારવાર બાદ જેલ હવાલે:વકીલ કિરીટ જોશીની હત્યા મામલે કોરોના પોઝિટિવ ત્રણ આરોપીઓને વિડીયો કોલ દ્વારા કોર્ટમાં રજુ કરાયા, સારવાર બાદ જેલ હવાલે કરાશે

જામનગરમાં એડવોકેટ કિરીટ જોશીની હત્યામાં કલકત્તાથી ઝડપાયેલા ત્રણેય શખ્સોને કોર્ટમાં રજુ કર્યા હતા ત્યારે 12 દિવસના રિમાન્ડ મળ્યા હતા. ત્યારબાદ રિમાન્ડ પૂરા થતાં પેલા કોરોના ટેસ્ટ કરવામાં આવ્યો હતો ત્યારે ત્રણેય આરોપીનો કોરોના ટેસ્ટ પોઝિટિવ આવતા કોર્ટમાં વિડીયો કોલ દ્વારા રજૂ કરવામાં આવ્યા હતા. કોર્ટે સારવાર બાદ ત્રણેય આરોપીઓને જેલ હવાલે કરવાનો હુકમ કર્યો છે.

જામનગરના એડવોકેટ કિરીટ જોશીની હત્યા બાદ નાસી છુટેલા આરોપીઓ દેશના વિવિધ રાજ્યો અને અન્ય ચાર દેશોમાં ભટકીને ફરી ભારતમાં કલકત્તામાં આવ્યાની પોલીસને ચોક્કસ બાતમી મળી હતી. જેના આધારે તાજેતરમાં જામનગર એલસીબી બ્રાન્ચની ટીમે કલકત્તાથી ત્રણેય આરોપી હાર્દિક પુજારા ઠક્કર, દિલીપ પુજારા ઠક્કર અને જયંત ચારણ ગઢવી ગામના ત્રણેય આરોપીને ઝડપી લીધા હતા અને ત્રણેયને જામનગર લાવ્યા બાદ કોવિડ ટેસ્ટ કરાવ્યો હતો તે કોવિડ ટેસ્ટ નેગેટીવ આવતા તેની ધરપકડ કરી હતી. હત્યાની તપાસ ગ્રામ્ય ડીવાયએસપી કૃણાલ દેસાઈને સોંપવામાં આવી હતી અને ત્રણેય શખ્સોને કોર્ટમાં રજૂ કરી પોલીસે 12 દિવસના રિમાન્ડ પર લીધા હતા.

રિમાન્ડ દરમિયાન ડુપ્લિકેટ પાસપોર્ટ કેસ આધારકાર્ડ જન્મતારીખનો દાખલાનો પણ કેસ નોંધાયો છે અને હત્યાને લગતું સાહિત્ય એકઠું કરી કબજે કરવામાં આવ્યું છે. રિમાન્ડ દરમિયાન ત્રણે આરોપીના કોરોના રિપોર્ટ કરાવવામાં આવ્યો હતો તેમાં ત્રણેય આરોપીને કોરોના પોઝિટિવ આવતા જામનગર એલસીબી અને એસઓજીના ચુસ્ત પોલીસ બંદોબસ્ત સાથે જામનગરની કોવિડ હોસ્પિટલમાં સારવાર માટે દાખલ કરવામાં આવ્યા હતા. જ્યારે કોર્ટ સમક્ષ વિડીયો કોલથી હાજર કરવામાં આવ્યા હતા. ત્રણેય આરોપીને કોરોનાની સારવાર બાદ જેલ હવાલે કરવાનો હુકમ કરવામાં આવ્યો છે.