ઢાંકપિછોડો કરવા ધમપછાડા શરૂ:દ્વારકાના નાગેશ્વર રોડ પરના ગેરકાયદેસર બાંધકામનો મામલો મુખ્યમંત્રી સુધી પહોંચતા યાત્રાધામમાં ખળભળાટ

દ્વારકામાં હાલ ગેરકાયદેસર બાંધકામ તોડવાનો સિલસિલો ચાલુ છે ત્યારે નાગેશ્વર રોડ પર મંજૂરી મુજબ બાંધકામ થયું ન હોય, ગેરકાયદેસર બિલ્ડીંગ ખડકી દીધાનો મામલો મુખ્યમંત્રી સુધી પહોંચતા દ્વારકા બિલ્ડર લોબીમાં ભારે ચકચાર મચી જવા પામી છે. આ મામલે હવે ઢાંકપીછાડો કરવાની પણ શરૂઆત થઈ ગઈ છે.

દ્વારકા શહેરના નાગેશ્વર રોડ પર અંબુજાનગર વિસ્તારમાં રહેણાંક હેતુ માટેના ફલેટનું બાંધકામ કરવામાં આવ્યું છે. આ બહુમાળી ફ્લેટની ઓનલાઈન મંજૂરી મેળવવામાં આવી છે, પરંતુ મંજૂરી મુજબ બાંધકામ કરવામાં આવ્યું નથી જે અંગે દ્વારકા નગરપાલિકાના પૂર્વ પ્રમુખ પરેશ ઝાખરિયાએ મુખ્યમંત્રીને રજૂઆત કરી છે જેમાં જણાવ્યું છે કે, આ ગેરકાયદેસર બાંધકામ ઉભુ કરી ફ્લેટનું વેચાણ કરી નાના અને ગરીબ માણસને છેતરવામાં આવ્યા છે. નિયમ મુજબ બાંધકામ દૂર કરી ફોજદારી પગલાં ભરી દબાણકર્તા પાસેથી દંડ વસૂલ કરવો જોઈએ. આ બિલ્ડીંગમાં રેરાના નિયમોનું પણ ઉલ્લંઘન કરવામાં આવ્યું છે.

આ બાંધકામ અંગે ચીફ ઓફિસરે પણ જાત નિરીક્ષણ કર્યું નથી કે તેને રોકવામાં નિષ્ફળ ગયા છે. આ મામલે મુખ્યમંત્રીને રજૂઆત થતાં ભારે ચકચાર મચી જવા પામી છે.

કમ્પલીશન સર્ટિફિકેટ માટે મારી પાસે હજુ સુધી કોઈ આવ્યું નથી: ચીફ ઓફિસર
દ્વારકાના નાગેશ્વર રોડ ઉપર આવેલું બિલ્ડીંગ વિવાદાસ્પદ છે. આ અંગે અનેક ફરિયાદો મળી છે, પરંતુ સંબંધિત બિલ્ડીંગના સર્ટીફિકેટ માટે હજુ સુધી બિલ્ડર દ્વારા એપ્રોચ કરાયો નથી.> સી.બી. ડુડિયા, ચીફ ઓફિસર, દ્વારકા નગરપાલિકા.