આગ લાગતા અફરાતફરી મચી:જામનગરની જી.જી હોસ્પિટલમાં આગ લાગી, ફાયરની ટીમ તાત્કાલીક ઘટના સ્થળે પહોંચી, અંતે મોકડ્રિલ જાહેર કરાઈ

જામનગરની જી.જી હોસ્પિટલમાં આગ લાગી હતી. જેને લઈ ફાયર વિભાગને ફોન આવતા ફાયર ફાઈટર ઘટના સ્થળે દોડી આગને કાબુમાં લેવાની પ્રક્રિયા હાથ ધરી હતી. જોકે, અંતે તંત્રએ આ સમગ્ર ઘટનાને મોકડ્રિલ જાહેર કરી હતી.

જામનગર મહાનગરપાલિકાના ફાયર વિભાગમાં આજે સવારે શહેરની જી.જી. હોસ્પિટલના કોવિડ વોર્ડમાં આગ લાગી હોય તેવી જાણકારી મળતા તાત્કાલિક ધોરણે ફાયર ફાઈટર સાથે કાફલો જીજી હોસ્પિટલ ખાતે પહોંચ્યો હતો. ત્યાં લાગેલી આગને બુજાવવાના પ્રયત્નો હાથ ધર્યા હતા. અંતે આ બનાવને ફાયર શાખાએ મોકડ્રીલ જાહેર કર્યો હતો.

ગુજરાત રાજ્ય સરકારના આદેશ અનુસાર તેમજ જામનગરના ચીફ ફાયર ઓફિસર કે.કે. બીશનોઈના માર્ગદર્શન મુજબ દર મહિને ફાયર શાખા દ્વારા આ રીતેનું આયોજન કરવામાં આવે છે જેના ભાગરૂપે આજે સવારે શહેરની જી.જી. હોસ્પિટલમાં કોવિડ વોર્ડમાં આગ લાગી હોય જેની હોસ્પિટલના સ્ટાફને જાણકારી માટે ફાયર વિભાગ દ્વારા મોકડ્રીલ યોજાઇ હતી, જી. જી. હોસ્પિટલના સ્ટાફને મોકડ્રીલ દરમિયાન તાત્કાલિક અસરથી લાગેલી આગને કાબુમાં કઈ રીતે લેવી તે સહિતનું માર્ગદર્શન આપવામાં આવ્યું હતું. આ સમગ્ર કામગીરી ફાયર શાખાના સ્ટાફે કરી હતી.