સંભવત: આજે પહોંચી જશે:બનાસકાંઠામાં તરછોડાયેલા 4 હાથી જામનગર આવવા રવાના

બનાસકાંઠામાં તરછોડી દેવાયેલા 4 માદા હાથીને જામનગર ખસેડવાનો નિર્ણય લેવાયો છે. જામનગરના ઈન્ચાર્જ ડી.એફ.ઓ. રાધિકાબેન પરસાણાને આ બાબતને સમર્થન આપતા કહ્યું હતું કે, અત્યારે ચારેય હાથી ઓન ધ વે છે, જામનગર આવ્યા પછી તેનું મેડિકલ ચેકઅપ કરાવીને હેલ્થની ચકાસણી થયા પછી વધુ કહી શકાશે.

બનાસકાંઠાના દાંતીવાડા તાલુકાના સાતસણમાં સોમવારની મધરાતે અજાણ્યા શખસો 4 હાથીને બે ટ્રકમાં લાવીને સાંકળથી તેના પગ બાંધીને મૂકી ગયા હતા. આ ભેદી ઘટનાએ બનાસકાંઠા ફોરેસ્ટ ડિપાર્ટમેન્ટને અચંબિત કરી દીધુ હતું અને હાથીને મૂકી જનારાને શોધવા ચક્રો ગતિમાન કર્યા હતા. દરમિયાનમાં આ ચારેય માદા હાથી જામનગર રાધાકૃષ્ણ ટેમ્પલ એન્ડ એલીફ્રન્ટ વેલફેર ટ્રસ્ટને સોંપવાનો નિર્ણય લેવાયો હતો અને મંગળવારે મધરાતે આ ચારેય હાથીને જામનગર મોકલવા માટે બનાસકાંઠાથી રવાના કરી દેવામાં આવ્યા હતા.