કરૂણાંતિકા:ભોગાતમાંથી નવજાત શિશુનો મૃતદેહ મળી આવ્યો

દ્વારકા જિલ્લાના કલ્યાણપુર તાબેના નાના એવા ભોગાત ગામમાં કોઈ અજાણી મહિલાએ પોતાના નવજાત (શિશુ) બાળકને ત્યજી દેતા તે મોતને શરણ થયો છે. પોલીસ દફ્તરેથી જાહેર થયેલ વિગત અનુસાર કલ્યાણપુરથી 35 કી.મી. દૂર ભોગાત ગામેં આવેલ એક મંદિર પાસે ગઈકાલે નવજાત શિશુનો મૃતદેહ મળી આવ્યો હતો. પોલીસ સૂત્રો મુજબ કોઈ અજાણી મહિલાએ તેનું પાપ છુપાવવા માટે નવજાત શિશુને જન્મ આપી અને ત્યજી દેતા આ નવજાત શિશુ મોતને શરણ થયો હતો. આ ઘટના પોલીસને જાણ થતાં તુરંત જ પોલીસનો કાફલો ઘટનાસ્થળે પહોંચી મૃત શિશુનો કબ્જો સંભાળી પી.એમ.અર્થે જામનગર જી.જી. હોસ્પિટલમાં મોકલી દેવામાં આવ્યો હતો.

કલ્યાણપુર પોલીસે ભરતભાઇ નારૂભાઈ લુણાની ફરિયાદ પરથી અજાણી મહિલા વિરુદ્ધ ગુન્હો નોંધી શોધખોળ કલ્યાણપુર પી.એસ.આઈ એન.એચ. જોષી દ્વારા હાથ ધરવામાં આવી છે. ભોગાત જેવા નાના ગામમાં આવી ઘટના સામે આવતા સમગ્ર પંથક સહિત દ્વારકામાં ચકચાર જાગી છે.