પગલાં:ઓખાની 13 બોટના પરવાના 8 દિવસ માટે સસ્પેન્ડ

ઓખા-બેટદ્વારકાની 13 ફેરી બોટના પરવાના આઠ દિવસ માટે ગુજરાત મેરીટાઇમ બોર્ડે સસ્પેન્ડ કર્યા છે. ક્ષમતા કરતા વધુ મુસાફર, સલામતીના સાધનોના અભાવ સહિતના કારણોસર આ દંડનીય કાર્યવાહી કરવામાં આવી છે. શરતોના ભંગ સબબ દરેક બોટમાલિકોને રૂ.500 દંડની ભરપાઇ કર્યા બાદ લાયસન્સ પુન: શરૂ થશે.દ્વારકા આવતા મોટા ભાગના પ્રવાસીઓ ભગવાનનાં નિવાસ સ્થાન એટલે કે બેટ દ્વારકા દર્શને જતા હોય છે. ઓખાથી દરિયામાં ફેરી બોટ મારફત બેટ દ્વારકા જવાનું હોવાથી લોકો ફેરીબોટમાં પ્રવાસ ખેડી બેટદ્વારકા દર્શનનો લાભ મેળવતા હોય છે.

ગુજરાત મેરી ટાઇમ બોર્ડ દ્વારા ફેરી બોટ નું સંચાલન કરવામાં આવે છે. ત્યારે જીએમબીએ 13 ફેરી બોટના લાયસન્સ આઠ દિવસ માટે રદ કરતા બોટમાલિકોમાં દોડધામ મચી ગઇ છે. દરેક બોટમાલિકને રૂ.500 નો દંડ ફટકારાયો છે. સલામતીના સાધનો પ્રવાસીઓને દેખાય તેમ ન હોય, ક્ષમતા કરતા વધુ મુસાફરો સહિતના કારણોસર ગુજરાત મેરી ટાઇમ બોર્ડ દ્વારા આ પગલું લેવામાં આવ્યું છે.

ઓખામાં નિયમો અને શરતોના ભંગ બદલ પરવાના રદ્દ થયેલી ફેરી બોટ