ગૌરવ:દ્વારકાના શિવરાજપુર દરિયાકિનારે પ્રથમ વખત બ્લુ ધ્વજ લહેરાવાયો

દ્વારકાના શિવરાજપુર દરિયાને બ્લુ બીચ જાહેર કરાતા સોમવારે જિલ્લા કલેકટર નરેન્દ્ર કુમાર મીના દ્વારા પ્રથમ વખત બ્લુ ફ્લે લહેરાવવામાં આવ્યો હતો. દરિયાનું સ્વચ્છ પાણી અને કિનારો, વિવિધતા સભર દરિયાઈ જીવ સૃષ્ટિ, ગોતા ખોરી એટલે કે સ્કુબા ડાઈવિંગની અનુકૂળતા, દરિયાઈ જીવસૃષ્ટિના ચાહકો સંશોધકો, યુવાન સાહસિકોને આકર્ષે એવી તમામ અનુકૂળતાઓને કારણે બીચને બ્લુ બીચની માન્યતા આપવામાં આવી છે.

બીચ પર સોમવારે યોજાયેલા વિશિષ્ટ કાર્યક્રમમાં કલેકટર ઉપરાંત પ્રાંત અધિકારી નિહાર ભેટારીયા તથા બીચનો સ્ટાફ હાજર રહ્યો હતો. આ પ્રસંગે કલેકટરે જણાવ્યું હતું કે, તહેવાર,રજા કે કોઈ ખાસ પ્રસંગને યાદગાર બનાવીને માણવો હોય તો લોકો આ શિવરાજપુર બીચ પર આવવાનું પસંદ કરે છે. ખુબ જ ટુંકાગાળામાં વિકાસ પામતું આ બીચ હજુ પણનવી ઉંચાઈ એ પહોંચશે અને વધુ થી વધુ અહી સહેલાણીઓ આવશે તથા તમામ પ્રકારની સુવિધાઓ ઉપલબ્ધ થશે. અત્રે ઉલ્લેખનીય છે કે, દ્વારકાનો શિવરાજપુર બીચ પ્રવાસીઓ માટે આકર્ષણનું કેન્દ્ર છે.