આવકમા વધારો:તહેવારોમાં ફૂલની માંગ સાથે ભાવમાં 50 ટકાનો વધારો થયો, લાભપાંચમ સુધી ફૂલ 20 થી 94 ટકા સુધી મોંઘા બનશેનું અનુમાન

સાબરકાંઠા જિલ્લામાં 10 દિવસ અગાઉ કરતાં હાલમાં ફૂલના ભાવમાં 50 ટકા સુધીનો વધારો આવ્યો છે. દિવાળી અને લાભપાંચમ સુધીના તહેવારોમાં આ જ ફૂલ 20 થી 94 ટકા સુધી મોંઘા બનશે તેવું ફૂલના વેપારીઓનું અનુમાન છે. ધનતેરસથી લાભપાંચમ સુધી મુહૂર્ત પૂજનમાં ફૂલોની માંગ સૌથી વધુ હોય છે. એમાં પણ ગલગોટા અને ગુલાબના ફૂલની માંગ વિશેષ હોય છે. હિંમતનગર શહેર સહિત જિલ્લામાં 10 દિવસ પહેલાં એક કિલો ગલગોટા રૂ.100, જ્યારે ગુલાબ રૂ.150ના ભાવે મળી રહ્યા હતા.

પરંતુ દિવાળીના તહેવારોને લઇ બંને ફૂલના ભાવમાં 50 ટકા સુધીનો વધારો થયો હોય તેમ ગલગોટા રૂ.150 અને ગુલાબ રૂ.180ના ભાવે વેચાયા હતા. ફૂલના વ્યવસાય સાથે સંકળાયેલા વેપારીએ જણાવ્યું કે, ધનતેરસથી ફૂલની માંગ વધી છે. આ માંગ લાભપાંચમ સુધી રહેશે. જેને લઇ કિલો ગલગોટાનો ભાવ રૂ.180 અને ગુલાબનો ભાવ રૂ.350 સુધી પહોંચી જશે. એટલે કે, ગલગોટાના ફૂલ વધુ 20 ટકા અને ગુલાબના ફૂલ 80થી 90 ટકા મોંઘા થશે.