દંડની વસુલાત:ખાણ ખનિજ વિભાગે 2 દિવસમાં 18 લાખના દંડની વસુલાત કરી

સા.કાં. જિલ્લામાં ખનિજ ચોરી બેફામ થઇ રહી હોવાથી ખાણ ખનિજ વિભાગ દ્વારા ટેકનીકલ સર્વેલન્સનો ઉપયોગ કરી તેને અટકાવવાનો પૂરો પ્રયાસ કરવામાં આવી રહ્યો છે અને સફળતા મળી રહી છે ગત રોજ હરસોલ તાજપુર પાસેથી બિનઅધિકૃત રીતે ખનિજનું વહન કરતી 3 ટ્રક પકડી પાડી દંડકીય કાર્યવાહી હાથ ધરી છે સાથે જ બે દિવસમાં કુલ 18 લાખના દંડની વસુલાત થઈ છે.

છેલ્લા 2 દિવસ દરમિયાન જિલ્લામાં જુદી જુદી જગ્યાએથી બિનઅધિકૃત રીતે ખનિજનું વહન કરી રહેલ વાહનોને ટેકનીકલ સર્વેલન્સનો ઉપયોગ કરી ખાણ ખનિજ વિભાગે રેડ કરતા કુલ 13 કેસમાંથી કુલ રૂ.18 લાખની દંડની વસુલાત કરી છે. ગત રોજ પણ હરસોલ તાજપુર પાસેથી ખનીજ ચોરી કરતી 3 ટ્રક પકડી હતી.ચાલુ વર્ષે ખાણ ખનિજ વિભાગે કુલ 276 કેસ પૈકી કુલ રૂ. 3.39 કરોડના દંડની વસુલાત કરતા ખનીજ ચોરી કરતા ખનિજ માફીયાઓમાં ફફડાટ ફેલાયો છે.