છેતરપિંડી:વડાલીના નિવૃત્ત ક્લાર્કના ATM કાર્ડનો પાસવર્ડ જાણી ‌‌‌‌રૂ. 2.10 લાખ ઉપાડી લીધા

વડાલીમાં રહેતા 65 વર્ષીય નિવૃત્ત ક્લાર્ક પોણા બે વર્ષ અગાઉ એટીએમમાં રૂ. 5 હજાર ઉપાડવા ગયા હતા. તે દરમિયાન બાજુમાં ઉભા રહેલા શખ્સોએ પાસવર્ડ જોઇ લીધા બાદ બીજા દિવસે મધ્યરાત્રિએ તેમના ખાતામાંથી રૂ. 1.20 લાખ અન્યના ખાતામાં ટ્રાન્સફર થયા હતા અને રૂ. 90 હજાર એટીએમમાંથી ઉપડી ગયા હતા જે તે સમયે સાયબર સેલમાં અરજી કર્યા બાદ તા. 11-02-21 ના રોજ વડાલી પોલીસ સ્ટેશનમાં ફરિયાદ નોંધાવી હતી.

વડાલીમાં રહેતા કાન્તિલાલ અળખાભાઇ પરમાર (65) ગત તા.03-04-19 ના રોજ સવારે નવેક વાગ્યે જે.વી. માર્કેટના એટીએમમાં પૈસા ઉપાડવા ગયા હતા અને રૂ. 5 હજાર ઉપાડ્યા હતા તે દરમિયાન બીજા મશીન આગળ ઉભા રહેલ બે શખ્સો પાસવર્ડ જોઇ ગયા હતા અને તા. 04-04-19 ની મધ્યરાત્રિએ તેમના ખાતામાંથી રૂ. 1.20 લાખ અન્ય ખાતામાં અને રૂ. 90 હજાર એટીએમમાંથી ઉપડી ગયા હતા. જેથી બીજા દિવસે બેંકમાં તપાસ કરતાં રૂ. 1.20 લાખ દિપચંદ્ર પટેલ (રહે. ગાંધીધામ) ના એસબીઆઇના ખાતામાં ટ્રાન્સફર થયા હતા અને રૂ. 90 હજાર ગાંધીધામમાં એટીએમમાંથી ઉપડી ગયાની જાણ થતા સાયબરક્રાઇમમાં અરજી આપ્યા બાદ તા. 11-02-21 ના રોજ ફરિયાદ નોંધાવી હતી.