કમોસમી વરસાદ:ઉત્તર ગુજરાતના 25 તાલુકામાં 1 થી 4 મીમી વરસાદ તમામ પાકોમાં મોલોમસીનો ઉપદ્રવ વધશે

હિંમતનગર17 દિવસ પહેલા
  • કૉપી લિંક
ઠંડીથી બચવા સ્વેટર અને વરસાદથી બચવા છત્રીનો સહારો - Divya Bhaskar
ઠંડીથી બચવા સ્વેટર અને વરસાદથી બચવા છત્રીનો સહારો
  • સા.કાં. માં 1 થી 5 મીમી વરસાદ, અરવલ્લીમાં 7 મીમી વરસાદ
  • જીરામાં કાળિયોરોગ, વરિયાળીમાં ચરમી, સાકરિયો, ઇસબગુલમાં મોલોમસી, બટાકામાં સુકારો, દિવેલાના ગાંગડામાં સફેદ ફૂગ લાગશે, તમામ રોગ આગામી 3 દિવસમાં દેખાશે

સાબરકાંઠામાં બુધવારે મધ્યરાત્રે ગુરુવાર સાંજ સુધીમાં 1થી 5 મીમી કમોસમી વરસાદ વરસતાં બટાકા, રાયડો, વરીયાળી, જીરૂ સહિતના પાકને નુકસાન થવાની દહેશત પેદા થઇ છે. વડાલી તાલુકામાં સૌથી વધુ 5 મીમી વરસાદ નોંધાયો હતો. જ્યારે ડિઝાસ્ટર સૂત્રોના જણાવ્યાનુસાર વિજયનગર તાલુકામાં ગુરુવારે વરસાદ નોંધાયો નથી. અરવલ્લીમાં છેલ્લા ચાર દિવસથી વાતાવરણમાં અચાનક પલટો આવવાની સાથે મોડાસા માલપુર મેઘરજ ધનસુરા અને બાયડમાં 7 મીમી કમોસમી વરસાદ પડ્યો હોવાનું નોંધાયું હતું.

હજુ પણ આકાશમાં વાદળો છે અને શુક્રવારે પણ કમોસમી ઝાપટાની સંભાવના વ્યક્ત થઈ રહી છે ત્યારે શિયાળુ વાવેતર માટે ચિંતાનું કારણ પેદા થયું છે. હિંમતનગરના કાંકણોલના નરસિંહભાઇ પટેલે જણાવ્યું કે કમોસમી વરસાદથી બટાકા સહિત વિવિધ પાકમાં ઇયળોનો ઉપદ્રવ વધવો, ફૂગ આવવી, સૂકારા જેવી સમસ્યા આવી શકે છે. રાયડો વરિયાળી જીરૂ સહિતના પાકમાં પણ નુકસાનની સંભાવના છે. સાબરકાંઠા ખેતીવાડી અધિકારી વી.કે. પટેલે જણાવ્યું કે વાતાવરણ ખુલ્લું થાય ત્યારે નિયત પ્રમાણમાં દવાનો છંટકાવ કરવો અને હાલમાં પિયત ટાળવુ હિતાવહ છે.

તમામ પાકોમાં રોગ અને જીવાતનો ઉપદ્રવ વધશે
છેલ્લા 1 સપ્તાહથી વાદળછાયા વાતાવરણ બાદ થયેલા માવઠાંને લઇ મહેસાણાના ખેરવા કૃષિ વિજ્ઞાન કેન્દ્રના વરિષ્ડ વૈજ્ઞાનિક ડો.આર.એ.પટેલે જણાવ્યું હતું કે, તમામ પાકોમાં મોલો મચ્છીનો ઉપદ્રવ વધશે. જેમાં સૌથી મોટુ નુક્સાન કાળીયા રોગના કારણે જીરૂના પાકને થશે. આ ઉપરાંત, વરીયાળીમાં ચરમી અને સાકરીયો, ઇસબગુલમાં મોલો મચ્છી,બટાટા પાકમાં સુકારાનો, રાઇમાં ભુકી છારો અને મોલો રોગ લાગી શકે છે. તેમજ તમાકુના પાન બિડાઇ જશે. આ સાથે દિવેલાના પાકના ગાંગળા ખરી પડવાની સાજે ઉત્તર ગુજરાતમાં પ્રથમ વખત દિવેલાના ગાંગડા પર સફેદ ફૂગ લાગશે. આ તમામ રોગ આગામી 3 દિવસમાં દેખા દેશે.

આગાહી.......આજે પણ હળવા વરસાદની શક્યતા
હવામાન વિભાગની આગાહી મુજબ, શુક્રવાર સવારે ઝાકળ વર્ષા થઇ શકે છે. જો કે, કમોસમી વરસાદનું જોર ઘટતાં ઉત્તર ગુજરાતના છુટાછવાયા વિસ્તારોમાં હળવો વરસાદ થવાની શક્યતા છે.

અન્ય સમાચારો પણ છે...