ચકચાર:સાબરકાંઠાના તલોદની ICDS કચેરીમાં દારૂની મહેફિલ માણતો કર્મીનો વીડિયો વાયરલ

તલોદની આઈસીડીએસ કચેરીમાં કર્મચારીનો દારૂની મહેફીલ માણતો વીડિયો વાયરલ થતા દારૂબંધીની પોકળ વાતોના લીરે લીરા તો થયા છે. પરંતુ સરકારી કચેરીઓમાં નૈતિકતા અને ફરજનું અધ:પતન કેટલા નીચા સ્તરે પહોંચી ગયું છે તે કળવુ પણ હવે મુશ્કેલ બની રહ્યું છે. દારૂની બોટલ કચેરીમાં જ ટેબલ પર મૂકી મહેફીલ માણવાનો વીડિયો વાયરલ થતાં ખળભળાટ મચી ગયો છે.

સમગ્ર વિવાદ મામલે તલોદ આઈસીડીએસ કચેરીના અધિકારી રશ્મિકાબેન પ્રજાપતિએ જણાવ્યું કે આવું સાંભળવા મળ્યુ છે. પરંતુ વિડીયો મળ્યો નથી હું કામગીરી માટે ફિલ્ડમાં હોઉ તેવા સમયે આવું થાય તો મને કેવી રીતે ખબર પડે ? પુરાવો હાથ લાગશે તો ઉચ્ચ અધિકારીને જાણ કરી પગલાં લેવાશે.

ટેન્ડર પાસ કરાવવામાં પણ લાખોનો ભ્રષ્ટાચાર
ડિસેમ્બરના અંતિમ ચરણમાં સા.કાં. જિલ્લામાં મેન પાવર સપ્લાયના ટેન્ડરની કામગીરી હાથ ધરાતાં ચાલુ કંપનીને ટેન્ડર રિન્યુ કરી આપવા અને નવું ટેન્ડર તમને જ મળશે તેમ કહીને રૂ.1.5 લાખ અને 1 લાખ એક કર્મચારીએ લીધા હોવા અંગે ગત 7 જાન્યુઆરીએ ભોગ બનનારે કલેક્ટરને નામજોગ ફરિયાદના રૂપમાં ઇમેલ કાર્યવાહીની માંગ કરી હતી જેમાં પણ કોઇ કાર્યવાહી થઇ નથી.