તસ્કરી:કાંકણોલના ઉપસરપંચના 1.50 લાખ ભરેલા થેલાની હિંમતનગરમાં તફડંચી

હિંમતનગરના મહાવીરનગરમાં સોમવારે સવારે મહાકાળી મંદિરથી કાંકણોલ રોડના ખાતમુર્હૂત કાર્યક્રમમાં હાજરી આપવા આવેલા કાંકણોલના ઉપસરપંચના સ્કૂટર પર ભરાવેલ બે થેલા લઈ 25 વર્ષનો શખ્સ પલાયન થઈ જતાં દોડધામ મચી જવા પામી હતી. રૂ. દોઢ લાખની તફડંચી થઈ હોવા અંગે એ ડિવિઝન પોલીસ સ્ટેશનમાં જાણ કરાઇ હતી.મહાવીરનગરમાં સોમવારે સવારે મહાકાળી મંદિર નજીક કાંકણોલ રોડની ખાતમુહૂર્ત વિધિ હાથ ધરાઇ હતી. જેમાં હાજરી આપવા કાંકણોલ ઉપસરપંચ સુરેશભાઈ મોતીભાઈ પટેલ સ્કૂટર લઇને આવ્યા હતા.

અને રોડની સામેની બાજુ મંદિરના કોર્ટને અડીને સ્કૂટર પાર્ક કર્યું હતું સવા દસેક વાગ્યે 25 વર્ષનો શખ્સ સ્કૂટરની આગળ ભરાવેલ બે થેલા લઈને સરકી ગયો હતો. થોડીવાર બાદ આ બાબતની જાણ થતાં દોડધામ મચી હતી અને આજુબાજુના સીસીટીવી ચેક કરતા ઉઠાવગીર મંદિરની બાજુમાં ખૂલ્લા પ્લોટમાં પડી રહેલા પાણીના ટેન્કરની વચ્ચે જઈને બંને થેલાનો સામાન ઠાલવી થેલામાંથી રૂ.1.50 લાખ રોકડા, પાર્કર પેન, મેઝર ટેપ અને કાર્ડ હોલ્ડર તથા દુકાન અને ઘરની ચાવીઓ લઈ ચાલતો ચાલતો શ્રદ્ધા પાર્ક બાજુ જતો જણાય છે.

આ શખ્સ શ્રદ્ધા પાર્ક થી ગણપતિ મંદિર બાજુ ગયો હોવાની સંભાવના નકારી શકાતી નથી ઠાલવેલા ઢગલામાં એટીએમ અને ક્રેડિટ કાર્ડ પણ હતા પરંતુ તે નથી લઈ ગયો. સુરેશભાઈએ એડિવિઝન પોલીસને આ બાબતે લેખિત જાણ કરી હતી.