અંતિમ યાત્રા:બામરોલીના બીએસએફ જવાનને ગાર્ડ ઓફ ઓનર, જવાનનું ફરજ દરમિયાન મોત થયું હતું

પંચમહાલ જિલ્લાના શહેરા તાલુકાના બામરોલી ગામના બરજોડ ફળિયામાં રહેતા રમેશચંદ્ર લક્ષ્મણભાઈ બરજોડ અંદાજે છેલ્લા 21 વર્ષથી 37 બટાલીયનમાં ફરજ બજાવતા હતા અને હાલ તેઓ બનાસકાંઠાના દાંતીવાડા ખાતે ફરજ બજાવી રહ્યા હતા, જેઓ એક મહિના પહેલા સામાજિક કામ અર્થે પોતાના વતન બમરોલી ખાતે આવ્યા હતા અને રજા પુરી થતા જવાન રમેશચંદ્ર બુધવારે ફરજ પર હાજર થયા હતા જ્યાં પરેડ દરમિયાન તેઓને અચાનક ચક્કર આવતા તેઓ નીચે પડી જતા ત્યાં હાજર જવાનોએ તેઓને સારવાર અર્થે ખસેડયા હતા,

પરંતુ તબીબે જવાન રમેશચંદ્રનું મોત થયાનું જાહેર કર્યું હતું.જેની જાણ તેઓના પરિવારજનોને થતાં ઘેરાશોકની લાગણી છવાઈ હતી અને BSFના જવાન રમેશચંદ્રના પાર્થિવદેહ લેવા માટે પરિવારજનો દાંતીવાડા ખાતે પહોંચ્યા હતા અને ત્યાંથી આર્મીની એક ટુકડી સાથે રમેશચંદ્રના પાર્થિવદેહને આર્મીની ગાડીમાં માદરે વતન આવવા નીકળ્યા હતા,ત્યારે ગુરુવારની મોડી રાત્રિના 12 વાગ્યાના સુમારે જવાન રમેશચંદ્રનો પાર્થિવદેહ શહેરા ખાતે આવી પહોંચતા શહેરાના રિલાયન્સ પેટ્રોલ પંપથી ડી.જે. સાથે BSFના જવાનના પાર્થિવદેહને બામરોલી લઈ જવાયો હતો.

જેમાં બાઈક રેલી સ્વરૂપે શહેરા સહિત આસપાસના વિસ્તારના લોકો મોટી સંખ્યામાં જોડાયા હતા.અને શુક્રવારના રોજ સવારે 10 વાગ્યા પછી જવાન રમેશચંદ્રની અંતિમ યાત્રા ડી.જે. સાથે કાઢવામાં આવી હતી,BSF જવાનની અંતિમ યાત્રામાં તેઓના પરિવારજનો સહિત મોટી સંખ્યામાં લોકો ઉમટી પડ્યા હતા.ત્યારબાદ જવાન રમેશચંદ્રને ૩૭બટાલીયનના જવાનોએ ગાર્ડ ઓફ ઓનર સાથે અંતિમ વિદાય આપી તેમના પાર્થિવ દેહને અગ્નિદાહ આપવામાં આવ્યો હતો.આમ રમેશચંદ્ર બરજોડની અંતિમ વિદાય સમયે ડી.જે. દેશભક્તિના ગીતો સાથે વાતાવરણ દેશભક્તિમય બન્યું હતું.